Kryeministri Edi Rama ka qenë i pranishëm në konferencën e 18 Adriatiko-Joniane ku dhe ka folur në lidhje me bashkëpunimet rajonale, në mënyrë që procesi i integrimit të vijojë sa më shpejt.
Si shkak i përplasjes mes Bullgarisë dhe Maqedonisë, Rama u shpreh se Shqipëria ndodhet në një proces të çuditshëm bllokimi, që mund ta prodhojë vetëm BE.
Sakaq, shtoi se për shqipërinë është si plani A,B,C.
Pjesë nga fjala e Ramës:
Është një mëngjes interesant, pasi dje mësuam finalistët e Kupës së Evropës që do të mbahet për herë të parë në historinë tonë në Shqipëri. Do të doja që ta nisja me këtë, për të theksuar që ky eveniment ishte i pamundur që të përfytyrohej deri pak vite më parë. Masa e transformimit tonë, pasi dolëm nga përvoja e tmerrshme e diktaturës, pasqyron shumë masën e barrës sonë në histori.
E shkuara ka qenë më pak bujare me ne, e kësisoj shtegu drejt së ardhmes është më i vështirë, shndërrimi që kemi parë në këto 30 vitet e fundit është i pashembullt, kur bëhet fjalë për ndikimin real mbi vendet dhe njerëzit.
Historia na ka caktuar apo na caktoi një izolim shumë të vështirë, me një barbari të spikatur, e sidoqoftë shkalla e transformimit që Shqipëria ka përjetuar është shumë e madhe. Mundësitë e të sotmes janë po ashtu shumë të mëdha. Kjo nismë është diçka që i shtohet nismave gjithnjë e më të shpeshta, në kuadër të paqes dhe të bashkëpunimit.
Ky është një moment shumë i rëndësishëm në historinë tonë, për të bërë çdo gjë që mundemi për të forcuar bashkëpunimin tonë në rajon. Të gjithë ne e kemi kuptuar që procesi i Integrimit nuk është i lehtë, në momentin që flasim, Shqipëria është në një proces të çuditshëm bllokimi, është nga ato situata që vetëm BE mund ta krijojë.
Nuk ka ndonjë shpjegim të matur se si mund të trajtohet, si mund të mbetesh peng i mosmarrëveshjeve mes dy vendeve të tjera. Por kësisoj na duhet të ecim përpara, dhe të mos e humbasim durimin, pasi Evropa është e vetmja gjendje e natyrshme e Shqipërisë.
Për disa që janë të pasur Evropa është një bankomat, Evropa për ne është zgjedhja e parë me vullnet të lirë në histori, kemi qenë nën perandori të ndryshme, por nuk ishte zgjedhja jonë, ishim të detyruar që të jetonim në diktaturë për rreth gjysmë shekulli. Për ne Evropa është plani A, B, C.
