Me të ardhur nga vizita disa ditore në Kosovë, Presidenti Ilir Meta ka nisur nga puna e tij e “zakonshme”, dekorimi i figurave të njohura.
Kështu, këtë të shtunë me shi, Presidenti Ilir Meta, ka vlerësuar me dekoratën e lartë “Gjergj Kastrioti Skënderbeu”, historianin dhe arkeologun e shquar francez, Profesor Pierre Cabanes.
Përmes një mesazhi në rrjetin social “Facebook”, Presidenti Meta, thekson se, ky titull është vlerësim për punën e palodhur shkencore prej disa dekadash, që daton nga viti 1976.
Ja mesazhi i Presidentit të Republikës, Ilir Meta në Facebook:
“????? Në prag të Ditës së Flamurit dhe Pavarësisë së Shqipërisë, pata kënaqësinë të vlerësoj historianin dhe arkeologun e shquar francez, Profesor Pierre Cabanes, me Dekoratën e lartë “Gjergj Kastrioti Skënderbeu”.
Nderimi i këtij miku të madh të kombit tonë është shprehje mirënjohje dhe vlerësimi për punën e palodhur shkencore prej disa dekadash, që daton nga viti 1976, për promovimin e historisë dhe kulturës së lashtë të Shqipërisë në nivel europian.
I jemi falenderues Profesor Cabanes edhe për pasurimin dhe nxitjen e marrëdhënieve të reja të bashkëpunimit shqiptaro-francez në fushën e arkeologjisë, duke kontribuar për zhvillimin cilësor të kësaj shkence në vendin tonë”.
/Priza.al/
