Ish-deputetja greke Eva Kaili do të qëndrojë në paraburgim për një muaj, sipas një vendimi të anëtarëve të Këshillit Gjyqësor në të cilin u paraqit të enjten në mëngjes në Bruksel për akuzat për korrupsion dhe pastrim parash të lidhura me skandalin e Katargate.
Mësohet se Kaili kishte kërkuar, pa sukses, të lirohej me byzylyk. Nëse ajo apelon brenda 24 orëve, ajo do të paraqitet në gjykatën e apelit brenda 15 ditëve.
Avokati i saj, Michalis Dimitrakopoulos, kishte thënë më herët në një stacion televiziv se prokurori ishte i shqetësuar se Kaili do të përpiqej të ikte nga Belgjika dhe madje argumentoi se do të rrëmbehej nga shërbimet sekrete të Katarit.
Në prononcimet e reja për Mega, pas shpalljes së vendimit, ai argumentoi se prokurori nuk ka paraqitur argumente ligjore që të justifikojnë ndalimin dhe ia atribuoi vendimin motiveve politike.
Kaili u transferua herët në mëngjesin e së enjtes në gjykatën e Brukselit nga burgu i Arenit ku po mbahet, e shoqëruar nga avokati i saj me origjinë greke Andre Rizopoulos dhe avokati penal Michalis Dimitrakopoulos.
“Ne i kemi dhënë të gjitha argumentet tona. Zonja Kaili nuk ka marrë ryshfet, ajo është e pafajshme,” u tha Dimitrakopoulos gazetarëve jashtë sallës së gjyqit. Rizopulos shtoi se “Kaili po bashkëpunon aktivisht në hetimet e autoriteteve gjyqësore”, ndërsa shprehu shqetësimin e tij që elementë të dosjes së çështjes janë publikuar në media.
Kaili u arrestua më 9 dhjetor dhe u akuzua për korrupsion dhe pastrim parash, si dhe tre bashkëpandehurit e saj – partneri i saj Francesco Giorgio, ish-deputeti italian Antonio Panceri dhe lobisti Niccolo Talamanca. Tre të fundit u deklaruan fajtorë të mërkurën e kaluar, me raporte se Giorgio u deklarua fajtor ndërsa përpiqej të shfajësonte partnerin e tij. Kaili, përkundrazi, kërkoi dhe mori një shtyrje në përpjekje për të ndarë pozicionin e saj dhe për t’u paraqitur si viktimë e partnerit të saj italian.
