Kina ka mohuar akuzat se ka kryer një sulm të madh kibernetik kundër gjigandit të teknologjisë Microsoft.
Shtetet e Bashkuara dhe vendet e tjera perëndimore të hënën akuzuan Kinën për hakimin e Microsoft Exchange, një platformë e njohur e postës elektronike, që përdoret nga ndërmarrjet në të gjithë botën.
Ato thanë se sulmi ishte pjesë e një sjelljeje “të pamatur” që kërcënon sigurinë globale. Kina tha se i kundërshton të gjitha format e krimit kibernetik, ndërsa pretendimet e vendeve perëndimore tha se janë “të trilluara”.
“SHBA-ja i ka mbledhur aleatët e saj për të bërë kritika të paarsyeshme ndaj Kinës për çështjen e sigurisë kibernetike”, u tha gazetarëve zëdhënësi i Ministrisë së Jashtme kineze, Zhao Lijian.
Mbretëria e Bashkuar, Bashkimi Evropian, Zelanda e Re dhe Australia ishin në mesin e vendeve që iu bashkuan SHBA-së në akuzimin e aktorëve – të sponsorizuar nga shteti kinez – për “veprimtari të dëmshme kibernetike”.
Sistemi i Microsoft-it furnizon me e-maile korporata të mëdha, biznese të vogla dhe organe publike në të gjithë botën. Sulmi kibernetik, që u identifikua në mars, preku së paku 30,000 organizata. Microsoft tha atë botë se beson se një sulmues i sponsorizuar nga shteti kinez, i quajtur Hafnium, qëndron prapa sulmit.
Microsoft ka fajësuar një grup kinez të spiunazhit kibernetik për shfrytëzimin e një dobësie në Microsoft Exchange – i cili lejoi hakerat të aksesonin në distancë kutitë e postës elektronike.
Grupi, i njohur si Hafnium, u zbulua nga Qendra e Inteligjencës Kërcënuese e Microsoft-it që ishte e sponsorizuar nga shteti dhe vepronte jashtë Kinës.
Burimet perëndimore të sigurisë besojnë se Hafnium fitoi njohuri të të mëparshme që Microsoft kishte planifikuar të merrej me cenueshmërinë, dhe kështu e ndau atë me grupe të tjera me bazë në Kinë për ta shfrytëzuar atë moment ndërsa mundën.
Burimet thonë se sulmi duket se sinjalizon një zhvendosje nga një fushatë spiunazhi e synuar në një sulm të ashpër, duke çuar në shqetësime se sjellja kibernetike kineze po përshkallëzohet.
Zyra e Jashtme e MB tha se qeveria kineze kishte “injoruar thirrjet e përsëritura për t’i dhënë fund fushatës së saj të pamatur, në vend të kësaj duke lejuar aktorë të mbështetur nga shteti të rrisin shkallën e sulmeve të tyre”.
Departamenti i Drejtësisë i SHBA njoftoi të hënën akuza penale kundër katër hakerave të lidhur me Ministrinë e Sigurimit të Shtetit të Kinës. Ai tha se ata ishin të lidhur me një fushatë afatgjatë që synonte qeveritë dhe entitetet e huaja në sektorët kryesorë në të paktën një duzinë vendesh.
/Burimi BBC/ përshtati në shqip Priza.al/
