Është dhënë ditën e djeshme masa e sigurisë “Arrest me burg’ në mungesë për vrasësin Klodian Çalamani, i cili me kazmë vrau 8-vjeçarin Mateo Vasiu dhe e groposi në oborrin e banesës së tij.
Në gjendje të rëndë psikologjike të gjithë familjarët, të afërm por edhe qytetarë të Fierit kanë dalë një ditë më parë para gjykatës për të pritur vrasësin monstruoz.
Një pritje që në përfundim nuk zgjidhi asgjë, përveç se shtoi tensionin dhe rëndoi gjendjen emocionale dhe psikologjike të familjarëve të viktimës 8-vjeçare, sepse vrasësi monstroz për shkak të rrezikshmërisë së lartë u gjykua në mungesë.
Para mediave familjarët kanë kërkuar për autorin të varet në sheshin qendror të qytetit teksa kanë refuzuar të mbetet i gjallë dhe të ushqehet e jetojë në burg me taksat e tyre dhe të gjithë qytetarëve shqiptarë.
Por sa i kushton shtetit shqiptar një i burgosur në burgjet e vendit?!
Në burgjet shqiptare llogariten rreth 5063 persona të cilët vuajnë dënimin për vepra të ndryshme penale teksa vendi jonë renditet ndër vendet me numrin më të lartë të të burgosurve për 100 mijë banorë në Europë.
Sipas statistikave, publikuara nga Këshilli i Europës, janë plot 178 të burgosur për 100 mijë banorë në Shqipëri, një shifër kjo më e lartë se sa mesatarja europiane, e cila nuk e kalon nivelin e 124 të burgosurve për 100 mijë banorë.
Numri i lartë i të burgosurve përktheht në shifra dhe shpenzime për shtetin.
Sipas po të njëjtit studim nga Këshilli i Europës shpenzimet e administrates së burgjeve vlerësohen në rreth 46 milionë euro në vit, bazuar kjo në shifrat e vitit 2019. Për një total prej 5063 të burgosurish deri më 31 janar të vitit të 2019, rezulton se kostoja mesatare vjetore për një të burgosur në vendin tone shkon në rreth 9 mijë euro. Duke pasur parasysh se kohëzgjatja mesatare e dënimit në vendin tone është 15.7 vite, rezulton se kosto mesatare për një të burgosur fiksohet në rreth 142 mijë euro, në rast se shpenzimet i llogarisim të qendrueshme nga viti në vit.
Mesatarisht 490 euro, mbledhur këto nga taksat e çdo qytetari shqiptarë shkojnë sot në Republikën e Shqipërisë për një të dënuar për vepra penale të rënda si vrasje apo abuzime seksuale.
Në këto kushte, sipas të dhënave kostoja e një të burgosuri në Shqipëri është ndër më të lartat nga vendet ish-komuniste. Më e lartë gjithashtu se paga minimale apo ndihma ekonomike që u jepet familjarëve.
Kostot e të burgosurve, sa shpenzohet nga arka e shtetit
Kostoja vjetore e një të burgosuri:
Shqipëri 9 mijë euro
Serbi 7 mijë euro
Ukrainë 1 mijë euro
SHBA 30 mijë euro
San Marino 270 mijë euro
Absolutisht në bazë të Konventës së të Drejtave dhe Lirive themelore të Njeriut çdo person, duke marrë parasysh krimin e kryer duhet trajtuar me respekt dhe dinjitet dhe të mos paragjykohet para se të gjykohet por ngjarje të tilla si vrasja e të miturit Mateo Vasiu të kërkojnë të ndalesh dhe të reflektosh!
Ndërkohë që shteti i jep në vit për çdo të burgosuri rreth 9 mijë euro, për arsimin gjatë vitit 2020, financoi rreth 352 milionë Euro ose sa 2,31% e Prodhimi Brendshëm Bruto, kur premtimi ishte 5%. Nga ana tjetër vendet e rajonit shpenzojnë së paku 4% të PBB-së për arsimin, ndërsa ne shpenzojmë gati 2 herë më pak.
Filozofia në këtë rast është shumë e thjeshtë, të burgosurit u mbulohen shpenzimet teksa për arsimin harrohen premtimet.
Krimi i rëndë i vrasjes së 8-vjeçarit do të dënohet me dënimin më të rëndë që ka Republika e Shqipërisë, që për rastin në fjalë dënimi për 38-vjeçarin është përkëdhelës.
Çalamani ka treguar se jetonte në një shtëpi të rrënuar, të vjetër dhe pa orenditë e nevojshme dhe jeta e re në burg për të do të jetë ‘luks’.
Mos ndoshta nevojitet dispozita të veçanta ligjore për krime të tilla monstruoze, për ngjarje dhe njerëz të cilët të mos e shohin burgun si luks por vërtetë si vuajtej dënimi?!
Sa të drejtë kanë familjarët e Mateo Vasiut dhe qytetarët të cilët refuzojnë të mbajnë me taksat e tyre qindra të burgosur të dënuar për krime nga më të ndryshmet?
Padyshim vrasja e Mateo Vasiut nuk është e para, historia kriminalistike e vendit ka njohur ngjajre dhe vrasës më ç’njerëzor. Por kjo ngjarje duhet të jetë fillimi i fundit të një sistemi drejtësie të korruptuar për palët, i cili shkakton dëme dhe dhimbje të mëdha në gjirin e familjeve të rropatura prej lodhjes dhe mundit, shqiptare.
Vrasja e paralajmëruar e Mateo Vasiut duhet të shënojë fillimin e fundit të gjyqtarëve të korruptuar dhe një sistemi gjyqësor të kalbur!
/Burimi: Gazeta Shqip/
