“Hawaladarët”, me origjinë shqiptare, vepronin si subjekt i jashtëligjshëm bankar, kryenin transfertat dhe fshihnin shuma të mëdha parash nga shitja e drogës.
Policia e Spanjës në bashkëpunim me Europol, ka çmontuar një rrjet kriminal në trafikun e drogës dhe pastrimin e shumave të mëdha parash të fituara nga krimi. Hetimi filloi në vitin 2021 bazuar në një raport të inteligjencës Europol, i cili çoi në identifikimin e një grupi kriminal të trafikut të drogës.
Grupi drejtohej nga shqiptarë dhe vepronte në prodhimin dhe trafikun e marijuanës, por organizonte edhe aktivitete të mëdha pastrimi parash për organizatat e trafikut të drogës. Ata përdorën sistemin hawala të bankingut nëntokësor, ndërsa bashkëpunonin me shtetasit kinezë.
Më 17 korrik 2023, policia arrestoi 27 persona, ku mes tyre ishin edhe shqiptarë. U sekuestruan shuma të mëdha parash, automjete, sende me vlerë dhe telefona celularë.
Konkretisht:
– 27 arrestime në të gjithë Spanjën në Alicante, Barcelona, Madrid, Malaga, Seville dhe Valencia;
– Sekuestrimi i orëve luksoze dhe stolive me vlerë mbi 400 000 euro;
– Sekuestrohen makina të modelit të lartë, telefona, celularë të koduar dhe 615 000 euro cash.
65 milionë euro xhiro për pastrim parash
Sipas hetuesve, rrjeti kriminal ka pastruar mbi 65 milionë euro nga aktivitetet e trafikut të drogës në më pak se një vit, vetëm midis muajve maj 2020 dhe mars 2021. Shtetasit kinezë luajtën një rol të madh në këto aktivitete kriminale duke pastruar sasi të mëdha të aseteve kriminale nëpërmjet bizneseve legale. Këto shuma të mëdha parash do të kalonin fillimisht nëpër këto struktura ligjore dhe më pas do të kompensoheshin diku tjetër. Më në fund, asetet kriminale do të arrinin në vendin e origjinës dhe më pas do të investoheshin atje.
“Hawaladarët”, me origjinë shqiptare, vepronin si subjekt i jashtëligjshëm bankar, kryenin transfertat dhe fshihnin shuma të mëdha parash nga shitja e drogës. Kjo shërbeu për financimin e operacioneve të reja kriminale. Dy shtetas shqiptarë kryesonin rrjetin kriminal, njëri ishte drejtues, ndërsa tjetri rolin e togerit dhe kontabilistit. Dy shtetas kinezë punuan për ta si koordinatorë duke menaxhuar një portofol të madh të institucioneve të shumta aziatike të përhapura në të gjithë Spanjën, të cilat shërbenin skema të pastrimit të parave për përfitime nga trafiku i drogës.
Roli i Europolit
Europol lehtësoi shkëmbimin e informacionit dhe ofroi mbështetje analitike. Gjatë ditës së veprimit, Europoli dërgoi dy ekspertë në Spanjë për të kontrolluar informacionin operacional në kohë reale dhe për të mbështetur hetuesit në terren me ekspertizë teknike dhe të rikuperimit të aseteve.
Me seli në Hagë, Holandë, Europol mbështet 27 Shtetet Anëtare të BE-së në luftën e tyre kundër terrorizmit, krimit kibernetik dhe formave të tjera të rënda dhe të organizuara të krimit.
