94 partive politike, të cilat kanë adresa të pasakta të selive, duhet të paguajnë gjobat e bilanceve financiare brenda 20 ditësh, është shprehur KQZ.
“Adresat e pasakta të selive, 94 parti politike duhet të ekzekutojnë sanksionin administrativ të vendosur nga KShZ
Komisioni Qendror i Zgjedhjeve i bën thirrje publike 94 subjekteve politike që të bëjnë ekzekutimin vullnetar të sanksionit administrativ të vendosur nga Komisioneri Shtetëror i Zgjedhjeve me vendimin nr. 430, datë 22.07.2021, për mosdorëzimin apo dorëzimin jashtë afateve e raporteve vjetore financiare për vitin 2020.
KQZ ka ezauruar mënyrën zyrtare të njoftimit të tyre në adresat e deklaruara nga ana e tyre në Gjykatën Rrethit Gjyqësor, Tiranë.
Institucioni i Postës Shqiptare ka konfirmuar mosmarrjen e këtij njoftimi nga këto parti politike, për shkak të mangësive të adresave të deklaruara nga partitë.
Bazuar në nenin 162, të ligjit nr. 44/2015 “Kodi i Procedurave Administrative”, për njoftimet publike, nga sot, 94 partitë politike kanë 20 ditë afat për të ekzekutuar vullnetarisht detyrimin e tyre.
Shkresa me emrat e 94 partive politike që i’u është drejtuar shkresa nga KQZ”, thuhet në njoftimin e KQZ-së./
