Jonida Maliqi gjithmonë e ka ndarë me ndjekësit në rrjetet e saj sociale dhe intervista marrëdhënien speciale që ka me prindërit e saj. Por ndërsa mamaja e këngëtares është një “personazh” i njohur në Instagram, sidomos në kohën e karantinës, babai i saj ka zgjedhur të jetë më i rezervur.
Ditën e djeshme ishte një ditë speciale për të atin e artistes, i cili festoi datëlindjen dhe sigurisht nuk ka munguar edhe urimi i Jonidës për të. Bashkangjitur me një foto shumë të bukur të familjes, Maliqi ka shkruar disa fjalë emocionuese për të atin, duke treguar gjithë dashurinë dhe vlerësimin që ka për të dhe duke na zbuluar edhe njëherë marrëdhënien e veçantë që ka pasur që e vogël me të.
“Do më duheshin ditë e netë të tëra për të të shprehur me fjalë dashurinë, respektin dhe fatin e madh që kam një baba si ti. U bëfsh 100 vjeç o krijesë e rrallë e kësaj toke! Të dua aq shumë sa edhe e vogël kur të duhej të shkoje me shërbim unë nuk flija dot pa pulovrën që mbante era babush dhe jam më se e lumtur që këtë erë e ndjej sot e kësaj dite në shtëpi.“- shkruan Jonida.
