Franca ka nisur për herë të parë dërgimin e gazit natyror në Gjermani, tha të enjten operatori francez i rrjetit të gazit GRTgaz, teksa Berlini përpiqet të diversifikojë furnizimin e tij me energji pas ndërprerjes së dërgesave të gazit rus.
GRTgaz tha se tubacioni i gazit që lidh të dy vendet në fshatin kufitar francez të Obergailbach ka filluar të japë një kapacitet fillestar ditor prej 31 gigavat-orë.
Sasia pritet të rritet përfundimisht në një maksimum ditor prej 100 gigavat-orë, që përfaqëson më pak se 2% të konsumit të përgjithshëm të gazit të Gjermanisë, sipas shifrave nga Ministria Franceze për Tranzicionin e Energjisë.
Kreu i agjencisë rregullatore të rrjetit të Gjermanisë, Klaus Mueller falënderoi GRTGaz në frëngjisht në një postim në Twitter të enjten, duke shtuar se “Dursimet franceze të gazit nëpërmjet Saarland ndihmojnë sigurinë e furnizimit të Gjermanisë”.
Lëvizja vjen pasi Gjermania dhe vendet e tjera evropiane kërkojnë të diversifikojnë importet e gazit pasi Rusia ndaloi furnizimet me gaz natyror të lirë nga i cili kontinenti varej për vite me radhë për të drejtuar fabrika, për të prodhuar energji elektrike dhe për të ngrohur shtëpitë.
Presidenti francez Emmanuel Macron njoftoi muajin e kaluar se Franca dhe Gjermania ranë dakord për një marrëveshje solidariteti energjetik. Franca do të ndihmonte Gjermaninë me furnizimin me gaz, ndërsa Gjermania do të prodhonte më shumë energji elektrike për të furnizuar Francën gjatë periudhave të pikut të konsumit.
Qeveria franceze ka shprehur shqetësime për mungesat e mundshme të energjisë elektrike gjatë dimrit, pasi 25 nga 56 reaktorët bërthamorë të Francës janë mbyllur tani për mirëmbajtjen e zakonshme dhe, në disa raste, për të riparuar problemet e korrozionit. Qeveria tha se EDF, e cila operon centralet bërthamore të Francës, është zotuar t’i rifillojë të gjitha deri në këtë dimër.
