Ministri i Punëve të Jashtme të Kroacisë, Gordan Grliq Radman, në konferencën ndërkombëtare GLOBSEC në Bratisllavë të Sllovakisë, iu bëri thirrje 5 shteteve të BE-së që të njohin pavarësinë e Kosovës. Ai deklaroi se Kroacia inkurajon Qipron, Greqinë, Rumaninë, Spanjën dhe Sllovakinë që ta njohin pavarësinë e Kosovës.
“Kroacia inkurajon pesë anëtarët e tjerë të BE të njohin Kosovën, sepse kjo do të kontribuonte në stabilizimin e rajonit dhe vetë Kosovës. Integriteti territorial i shteteve të Ballkanit duhet të ruhet dhe respektohet, domethënë pa i ridefinuar kufijtë, siç kemi dëgjuar muajt e fundit, kur qarkulluan disa ‘non paper’ famoze, të cilat ishin orientuar në atë drejtim”, -u tha Grlic Radman gazetarëve sot, raportojnë mediat serbe.
Shefi i diplomacisë kroate po merr pjesë në konferencën ndërkombëtare GLOBSEC në Bratislavë, në të cilën gjithashtu do të diskutohet situata në Ballkanin Perëndimor.
Kosova e shpalli pavarësinë në vitin 2008, e cila u njoh nga të gjithë anëtarët e BE-së, përveç Qipros, Greqisë, Rumanisë, Spanjës dhe Sllovakisë.
/Priza.al/
