Deputeti i PD-së, Gazment Bardhi ka dorëzuar sot në Gjykatën Kushtetuese kërkesën për shpalljen të pavlefshëm mandatin e deputetit për ministren për Europën dhe Punët e Jashtme, Olta Xhaçka.
Në një dalje për mediat, Bardhi tha se është rast unik në botë kjo që ndodh në Shqipëri, ku një ministre shpallet dhe investitorë strategjike, ku i jepet pronë publike për të investuar në shërbimet e hotelerisë së turizmit.
“Shqipëria është rasti unik në botë ku ministri për Europëm dhe Punët e Jashtme, deputetja Xhaçka gëzo njëkohësisht dhe statusin e partnerit strategjik për një investim në Himarë me vlerë 5.5 mln euro. Me vendim të eprorit të saj, Rama, ministrja Xhaçka dhe bashkëshorti i saj kanë përfituar të drejtën për të përdorur pronën publike për aktivitetin e tyre tregtar për fushën e hoteleri turizmit. Kjo bie ndesh me nenin 7 të Kushtetutës që i ndalon deputetët që të përfitojnë fonde publike apo të përfitojnë pronë publike. Grupi parlamentar i PD i kërkon gjykatës Kushtetuese që të marrë në shqyrtim pa vonesë kërkesën e depozituar dhe të garantojë zbatimin e këtij ndalimi kushtetues pavarësisht se bëhet fjalë për një njeri të rëndësishëm të kabinetit qeveritar”, tha Bardhi.
Ditën e djeshme gjatë seancës maratonë në Kuvend, mazhoranca votoi raportin e bërë në Këshillin e Mandateve në Kuvendin e Shqipërisë që kundërshtonte heqjen e mandatit të deputetes Olta Xhaçka.
