Është vendosur në memorialin para Ministrisë së Brendshme ylli i nënkomisarit Saimir Hoxha bashkë me mbi 200 dëshmorë të tjerë të Policisë. Gjatë kësaj ceremonie ka qene i pranishëm dhe kryeministri Rama, ku ka premtuar se fëmijët e tij nuk do të jenë kurrë vetëm.
Ai kujtoi se ka kaluar një kohë e gjatë që kur u vendosur ylli i fundit në memorial, por ai theksoi se statistikat nuk ka rëndësi pasi një jetë e vetme vlen sa gjithë të tjerat.
Të pranishëm në ceremoni ishin zyrtarë të lartë të qeverisë, ministrisë dhe vetë familjarë e të afërm të të ndjerit nënkomisar, Saimir Hoxha.
FJALA E KRYEMINISTRIT:
Sot ne jemi këtu për të mbajtur ceremoninë e vendosjes së yllit në murin e kujtesës së Policisë së Shtetit pranë yjeve të gjithë dëshmorëve të trupave tona të rendit e sigurisë në harkun e këtyre viteve.
Është një kohë e gjatë qysh se është vendosur ylli i mëparshëm dhe në një kuptim është lehtësim, që në gjithë morinë e atyre yjeve në atë mur, në këto vite, numri i rasteve tragjike është më pak se gishtat e një dore. Nga ana tjetër statistikat s’kanë rëndësi, sepse një jetë e vetme vlen sa gjithë jetët kur ajo humbet.
Nuk dua të zgjatem se besoj që ky shi që po bie rrëmbyeshëm i thotë më mirë se sa të gjitha fjalët dhe ndjenjat tona.
Dua të them se sidoqoftë ndjej një lehtësim kur mendoj se fëmijët e dëshmorit nuk do të jenë vetëm. Ne do të përkujdesemi për ta siç kemi nisur për familjet e tij deri kur të arrijnë moshën e pjekurisë dhe të dalin me këmbët e tyre në jetë.
170% e pagës për fëmijët nuk thotë asgjë në raport me humbjet, natyrisht që as ato 50 mijë lekë nuk thonë asgjë, por sidoqoftë është një lehtësim të mendosh se fëmijët do të jenë të shoqëruar përdore jo vetëm nga nëna, gjyshërit, por dhe nga shteti, nuk do i mungojë asgjë njësoj sikur babai të ishte në jetë, përveç mungesës së tij që askush nuk e zëvendëson dot. Lavdi dëshmorëve të atdheut që sot iu bashkohet dhe ylli i Saimirit.
/Priza.al/
