Më mirë aspak sesa me lojtarët rusë dhe bjellorusë. Këtë e kanë bërë të qartë për DW organizatorët e Lojërave Evropiane, të cilat janë planifikuar të zhvillohen në Krakov të Polonisë në qershor. Ata janë të prirur të ruajnë përjashtimin e sportistëve nga të dy vendet, edhe nëse kjo do të thotë që disa sporte mund të tërhiqen nga eventi. “Po, ne jemi të shqetësuar se ekziston një rrezik i tillë,” tha zëdhënësi i Lojërave, Dawid Glen. “Ne shohim se çfarë vendimesh merren ndërkombëtarisht, por kjo nuk e ndryshon qëndrimin tonë”.
Të enjten e kaluar, Shoqata Ndërkombëtare e Boksit (IBA) i kërkoi Komitetit Olimpik Ndërkombëtar (IOC) të revokojë statusin e Lojërave Evropiane si një kualifikim olimpik “për të kundërshtuar masat diskriminuese të marra nga Komiteti Olimpik Evropian”, i cili mbikëqyr lojërat. Presidenti i IBA është Umar Krewlew, sponsori kryesor është kompania shtetërore ruse e energjisë Gazprom. Shoqata kishte pranuar atletë nga Rusia dhe Bjellorusia në kampionatin botëror të boksit amator për femra dhe kampionatin e ardhshëm botëror të meshkujve, nën flamujt e tyre kombëtarë dhe me himne.
