Shefi i politikës së jashtme të Bashkimit Evropian, Josep Borrell, deklaroi se paqja në Ukrainë nuk do të ishte e mundur derisa Rusia të tërhiqte trupat e saj, mirëpo Moska nuk ka dhënë ende shenja se është gati për diçka të tillë.
“Kam frikë se Rusia nuk është gati të tërhiqet dhe për aq sa nuk tërhiqet, paqja nuk do të jetë e mundur. Është Rusia ajo që duhet të bëjë të mundur paqen, agresori duhet të tërhiqet nëse dëshiron një paqe të qëndrueshme”, tha Borrell për agjencinë e lajmeve Reuters.
Më herët, Kremlini i Rusisë akuzoi Kievin në lidhje me bisedimet e mundshme të paqes dhe i bëri thirrje Uashingtonit që ta shtyjë Ukrainën drejt diplomacisë.
Forcat e Putinit kanë pësuar një sërë pengesash në terren, ku më e fundit është humbja e qytetit jugor të Khersonit. Rusia që atëherë ka përdorur sulme ajrore që synojnë infrastrukturën energjetike dhe objektiva të tjera civile në pjesë të Ukrainës që ajo nuk i mban.
