Martesa e parë e të njëjtit seks në Malin e Zi u regjistrua të Dielën në vendpushimin bregdetar të Budvës, një vit pasi Mali i Zi u bë vendi i parë jo-BE në Ballkan që legalizoi partneritetet civile të të njëjtit seks.
Ministrja e Administratës Publike dhe Medias, Tamara Srzentic njoftoi kurorëzimin në Malin e Zi të së parës martesë të personave të së njëjtës gjini. Srzentić u shpreh e lumtur që zyrtarisht kishte filluar zbatimi i Ligjit për Partneritet të Jetës dhe i uroi partnerëve, lumturi e shumë dashuri.
Para tetë vitesh, në Kaliforni të Shteteve të Bashkuara u kurorëzua martesa e parë e të njëjtës gjini mes Chris Perry e Sandy Stier. Në atë kohë, punoja në administratën e shtetit të Kalifornisë dhe Chris ishte shoqja e bashkëpunëtorja ime prej shumë kohësh. Unë e di sa e rëndësishme ishte ajo ditë për to dhe një hap i madh për Kaliforninë.
Sot është ditë e rëndësishme për komunitetin LGBTIQ dhe jam krenare që partneriteti i parë i njerëzve të së njëjtës gjini është realizuar në vendin tonë!
Ministrja Srzentic shprehu bindjen se çdo njeri ka të drejtë të ndërtojë jetën në përputhje me ndjenjat e brendshme. Sipas saj, “administrata publike duhet të krijojë politika të qarta e të sigurojë zbatimin, që çdo njeri të ndihet i respektuar në mënyrë të barabartë”.
Edhe pse Ligji për Partneritetin Jetësor të Personave të Gjinisë së Njëjtë u miratua një vit më parë, Srzentic theksoi se duhet bërë shumë më tepër që të plotësohen të gjitha kushtet për zbatimin e tij të plotë.
Komuniteti LGBTIQ gjithmonë do të ketë një partner dhe aleat tek unë për të gjitha aktivitetet që kontribuojnë në përmirësimin e cilësisë së jetës të anëtarëve të këtij komuniteti, si dhe promovimin dhe mbrojtjen e të drejtave dhe lirive të tyre!
/Burimi: Balkaninsight/ përshtati në shqip Priza.al/
