Prej vitesh, restaurimit dhe mirëmbajtjes së monumenteve kulturore në vend po i kushtohet një rëndësi e veçantë. Ministrja e Kulturës Elva Margariti ndan vazhdimisht në rrjetet e saj sociale punën e dikasterit që drejton. Që nga dita e djeshme, Ministrja njofton se ka nisur puna për mirëmbajtjen dhe restaurimin e Kishës së Shën Mëhillit në Kostar të Finiqit. Këto punime janë pjesë e paketës së mirëmbajtjes të Drejtorisë Rajonale të Trashëgimisë Kulturore Vlorë, për vitin 2023.
Postimi i plotë:
Kanë filluar punimet e mirëmbajtjes, restaurimit, konsolidimit edhe në objektin tjetër monument kulture, kat. I, në kishën e Shën Mëhillit, e cila ndodhet në Kostar të Bashkisë së Finiqit, pjesë e paketës së mirëmbajtjes të DRTK Vlorë, për vitin 2023.
Pas hartimit të projektit nga DRTK Vlorë dhe miratimit nga Këshilli Kombëtar i Trashëgimisë Kulturore Materiale, kanë nisur punimet që konsistojnë kryesisht në:
– Restaurimin dhe konsolidimin e muraturës së rrënojave të kishës;
– Restaurimin e kalldrëmit të kishës;
– Konsolidim i elementeve konstruktive;
– Restaurim i elementeve dekorative në muraturë;
– Sistemimin e terrenit etj.
