Është një prej perlave natyrore të Shqipërisë, e vetmja për llojin e saj jo vetëm në vend por edhe në Ballkan, por sidoqoftë kjo nuk e përjashton nga rreziku që të shkatërrohet si çdo gjë e bukur në Shqipëri.
Parku Kombëtar i Divjakë-Karavastasë, një habitat unikal për shumë shpendë dhe kafshë të egra, rrezikun më të madh e ka prej “kafshës” njeri.
Edhe pse ky park mbrohet me fanatizëm nga një administratë e motivuar deri në sakrificë për ta ruajtur këtë mrekulli të natyrës, herë pas here ai cenohet nga babëzia e njerëzve.
Ditën e sotme “Priza.al” ka mësuar se një kompani private e paautorizuar dhe në mënyrë abuzive ka futur kamionët dhe makineritë e rënda në ambientet e këtij parku, për të grabitur rërën e plazhit të Divjakës.
Menjëherë skrepi dhe kamionët e kompanisë janë pikasur nga Administrata e Parkut, e cila është munduar që të frenojë masakrën mjedisore në një territor në të cilin është e ndaluar rreptësishtë si me ligj ashtu dhe me konventa ndërkombëtare që të kryhen punime të paautorizuara. Për më tepër punime që cenojnë habitatin natyror.
Nga sa ka mësuar “Priza.al”, Administrata e Parkut ka njoftuar fillimisht edhe Postën Policore që ndodhet brenda parkut, si dhe ka kërkuar edhe ndihmën e komisariatit të Divjakës.
Por burimet i kanë thënë “Priza.al” se kompania private nuk ka pranuar ta ndalë punën, me gjithë ndërhyrjen e administratës dhe Policisë, me pretendimin se kishte marrë leje nga “shumë lart”.
Sipas burimeve, “përfaqësuesit e kompanisë private u munduan fillimisht që ta justifikonin këtë veprim me nevojitjen e rërës për të mbuluar plehrat në landfillin e Divjakës. Por pasi u dështoi ky pretekst, ata përdorën alibinë e njohjes dhe marrjes së një ‘leje’ gojore nga deputeti i zonës dhe njëkohësisht Zv.kryeministri Erion Braçe”.
Sipas burimeve që pohuan për “Priza.al”, shumë persona në zonën e Divjakës “sa herë që kanë halle apo kërkojnë të zgjidhin probleme, kontaktojnë edhe deri direkt me deputetin dhe Zv.kryeministrin Braçe”.
Ky i fundit, nga sa kemi mësuar, u hap të gjithëve telefonin dhe shumë personave nga kjo zonë u ka zgjidhur shumë probleme, por duket se tashmë edhe “të fortët” që kërkojnë të përvetësojnë në kurriz të pasurive natyrore, po e përdorin si alibi eemrin e Erion Braçes.
Por duket se këtë gjë nuk e kanë “ngrënë” drejtuesit e Administratës së Parkut Kombëtar, të cilët menjëherë kanë njoftuar organet përkatëse, ministrinë e Turizmit dhe Mbrojtjes së Mjedisit, si dhe kanë depozituar ndaj subjektit edhe një kallëzim në Prokurorinë e Rrethit Gjyqësor Lushnjë.
“Duhet te marre fund njehere dhe pergjithmone historia e germimeve dhe e marrjes se materialit ne Parkun Kombetar Divjakë-Karavasta. Krimet mjedisore konsiderohen si krime ndaj njerezimit dhe kodi penal parashikon denime te renda”,- shkruante në profilin e tij në Facebook, drejtori i Administratës së Parkut Kombëtar Divjakë-Karavasta, Ardian Koçi.
Ndërkohë po sot një reagim zyrtar është bërë edhe në profilin e vet Administratës së Parkut, ku thuhej se:
“Sot dorezuam ne prokurorine e Lushnjes kallezimin ndaj nje subjekti qe merrte rere ne plazhin e Divjakes. Germimet dhe marrja e materialeve ne nje zone te mbrojtur eshte nje krim mjedisor dhe pergjegjesit duhet te marrin denimin e merituar”,- thuhej në këtë njoftim.
Për të hulumtuar më tej rreth këtij krimi mjedisor, se cila është kompania që po e bën këtë, me lejen e cilit institucion, apo me miratimin e cilit politikan, “Priza.al” u mundua që të merrte një kontakt zyrtar me drejtuesit e Administratës së këtij Parku.
Por edhe pse nuk kemi mundur që të vendosim kontakt, përsëri “Priza.al” do ta ndjekë këtë çështje dhe do të merret me zbardhjen e saj, si një kontribut në mbrojtje të mjedisit dhe të pasurive natyrore shqiptare.
/Priza.al/
