Një shtetas 19-vjeçar ka rënë në prangat e policisë pasi në banesë iu gjetën 1127 fara narkotike të dyshuara cannabis sativa, si dhe krehër me 30 fishekë luftarak. I riu me inicialet T.K. banues në Mallakastër e kultivonte dhe më pas e tregtonte lëndën narkotike.
Gjithashtu në pranga ra edhe një 18-vjeçar, pasi dyshohet se i blinte këto fara kanabisi për t’i kultivuar.
Njoftimi i policisë:
Mallakastër /Finalizohet operacioni policor i koduar “Ndërprerja”.
Konstatohet dhe goditet një rast i tentativës për të tregtuar fara narkotike cannabis sativa, me qëllim kultivimin.
Mbante në banesë, 1127 fara kanabisi dhe fishekë luftarak, arrestohet 19-vjeçari.
Në pranga edhe një 18-vjeçar, pasi dyshohet se blinte fara kanabisi, me qëllim kultivimin.
Sekuestrohen farat narkotike dhe municion luftarak.
Në vijim të goditjeve të njëpasnjëshme ndaj veprimtarive kriminale në fushën e narkotikëve, specialistët e Seksionit për Hetimin e Narkotikëve dhe Sektorit Operacional të DVP Fier, të mbështetura nga inteligjenca informative, për një rast të tregtimit të farave të kanabisit, me qëllim kultivimin, organizuan dhe finalizuan operacionin policor të koduar “Ndërprerja”, në kuadër të të cilit u arrestuan në flagrancë shtetasit T. K., 19 vjeç, banues në fshatin Lofkënd, Mallakastër dhe K. N., 18 vjeç, banues në fshatin Aranitas, Mallakastër.
Në banesën e 19-vjeçarit, shërbimet e Policisë gjetën 1127 fara narkotike të dyshuara cannabis sativa, si dhe krehër me 30 fishekë luftarak.
Nga veprimet hetimore dyshohet se 18-vjeçari i kishte blerë shtetasit T. K., fara kanabisi, me qëllim kultivimin.
Farat narkotike dhe municioni luftarak u sekuestruan në cilësinë e provës materiale.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.
