Janë të shumtë individët që në mbarë botën tymosin nga një cigare kanabisi ose “hashashi” siç njihet, me qëllim që të qetësohen kur janë sidomos të stresuar. Por ata edhe pse kënaqen nga efekti parësor që marrin, nuk e dinë se çfarë i pret në një të ardhme jo fort të largët…
Sipas Zyrës së Kombeve të Bashkuara për Droga, droga më e konsumuar në vitin 2020 ishte kanabisi. Dhe studimet konfirmojnë se ai shkakton dëmtim të trurit, veçanërisht te më të rinjtë.
Të dhënat flasin qartë. Sipas raportit të fundit nga Zyra e Kombeve të Bashkuara për Drogën, i publikuar në fillim të vitit 2021, droga më e konsumuar në botë është kanabisi, me 192 milionë përdorues. Vijojnë opioidet me 58 milionë, amfetaminat (27 milionë), ekstazia (21 milionë) dhe kokaina (19 milionë).
Të dhënat tregojnë se përdorimi i kanabisit u rrit gjatë periudhave të bllokimit nga pandemia. Për më tepër, disa produkte të kanabisit e kanë rritur efektin e tyre, sepse përqindja e THC, përbërësi kryesor i tyre psikoaktiv, është rritur. Megjithatë, ky rrezik i shtuar nuk u shoqërua me një perceptim të shtuar të rrezikut.
Në veçanti, në Europë 19% e të rinjve midis moshës 15 dhe 24 vjeç përdorën kanabis në 2020, ndërsa rreth 1% e të rriturve janë përdorues të zakonshëm, pasi e kanë përdorur këtë lloj droge për më shumë se 20 ditë në muaj. Në Shtetet e Bashkuara, edhe më keq: përqindja e konsumatorëve të rregullt arrin 4.7%.
DËMTON TRURIN
Në dritën e të dhënave, ekspertët përsërisin se kanabis, i konsideruar gabimisht “i lehtë”, është i rrezikshëm, veçanërisht për të rinjtë. Në fakt, kanabisi ndërhyn në zhvillimin e trurit (një proces që përfundon rreth moshës 24-25 vjeç), dhe konsumi i tij, veçanërisht nga adoleshentët, është shoqëruar nga shumë studime me zhvillimin e sëmundjeve të ndryshme psikiatrike si skizofrenia, ose çrregullimi bipolar.
Një gjë është e sigurt: edhe nëse drogat nuk janë të gjitha të njëjta dhe profili i tyre i rrezikut ndryshon sipas molekulës dhe kontekstit në të cilin ato merren, drogat e lehta nuk ekzistojnë më, nëse ato kanë ekzistuar ndonjëherë. Me pak fjalë, nuk ka asnjë mënyrë të sigurt për t’ u droguar me ndonjë helm në qarkullim sot: as kanabis (aq i përhapur dhe aq i diskutuar) as, për shembull, ato pilula që të rinjtë i marrin sikur të ishin karamele. Përkundrazi ata duhet të dinë se substanca të caktuara mund të vrasin, edhe nëse përdoren vetëm një herë.
/Priza.al/
