Shërbimi i Sigurisë i Mbretërisë së Bashkuar MI5 ka lëshuar një paralajmërim të rrallë se një agjente e dyshuar kineze është infiltruar në Parlament për të ndërhyrë në politikën e Mbretërisë së Bashkuar.
Sipas mediave të huaja, një alarm nga shërbimi i sigurisë tha se Christine Ching Kui Lee “krijoi lidhje” për Partinë Komuniste Kineze (CCP) me deputetë aktualë dhe aspirantë.
Më pas ajo u dha donacione politikanëve, me financime që vinin nga shtetas të huaj në Kinë dhe Hong Kong. Kjo vjen pas një hetimi “të rëndësishëm dhe afatgjatë” nga MI5, thanë burimet e Whitehall për BBC.
Një nga deputetët e financuar nga zonja Lee ishte Barry Gardiner nga laburistët, i cili mori mbi 420,000 paund prej saj në pesë vjet, por ai tha se gjithmonë i kishte vënë në dijeni shërbimet e sigurisë për donacionet.
Udhëheqësi i Liberal Demokratëve, Sir Ed Davey, gjithashtu mori një donacion prej 5,000 funte kur ai ishte sekretar i energjisë – por ai tha se paratë u pranuan nga shoqata e tij lokale dhe ishte “hera e parë që i ishte dhënë shkak për t’u shqetësuar”.
Sekretarja e Brendshme Priti Patel tha se ishte “thellësisht shqetësuese” që dikush “i cili është përfshirë me vetëdije në aktivitete të ndërhyrjes politike në emër të Partisë Komuniste Kineze ka vënë në shënjestër parlamentarët”.
Por ajo tha se Mbretëria e Bashkuar ka masa “për të identifikuar ndërhyrjen e huaj”.
Shërbimi i sigurisë tha se kushdo i kontaktuar nga zonja Lee duhet të jetë “i ndërgjegjshëm për përkatësinë e saj” dhe “përgjegjësinë e saj për të çuar përpara axhendën e CCP”.
Të gjithë deputetëve dhe kolegëve duhet t’u jepet një përditësim nga MI5 mbi rreziqet e sigurisë dhe si të ruhen nga ndërhyrjet
“Koordinim i fshehtë”
Sipas alarmit, zonja Lee pretendoi se përfshirja e saj me Parlamentin kishte qenë “për të përfaqësuar kinezët e Mbretërisë së Bashkuar dhe për të rritur diversitetin”.
Por MI5 tha se aktiviteti “ishte ndërmarrë në koordinim të fshehtë me Departamentin e Punës së Frontit të Bashkuar [të CCP], me financim të siguruar nga shtetas të huaj të vendosur në Kinë dhe Hong Kong”.
UFWD supozohet se po kërkon të “kultivojë marrëdhënie” me “figura me ndikim” për të siguruar që peizazhi politik i Mbretërisë së Bashkuar të jetë i favorshëm për CCP dhe të sfidojë ato që ngrenë shqetësime për partinë, duke përfshirë të drejtat e njeriut.
Shërbimi i sigurisë tha se zonja Lee kishte “angazhim të gjerë me individë në të gjithë spektrin politik të Mbretërisë së Bashkuar”, duke përfshirë grupin parlamentar të të gjitha partive tashmë të shpërbërë, të quajtur kinezë në Britani.
/Burimi: BBC/ Përshtati: Priza.al/
