Duke u nisur nga pjesëmarrja e lartë e qytetarëve në festën e Birrës në Korçë dhe fluksi i automjeteve në aksin rrugor Qafë Thanë-Korçë, policia rrugore u bën thirrje qytetarëve që të tregojnë kujdes dhe të respektojnë rregullat e qarkullimit rrugor.
Përmes një njoftimi, policia bën me dije se në këtë aktivitet do të hyjnë vetëm persona të pajisur me biletë. Ata do t’i nënshtrohen kontrolleve fizike përpara se të hyjnë në aktivitet ku nuk do të lejohet mbajtja e sendeve të ndaluara dhe më pas do të mund të hyjnë në brendësi të Terminalit vetëm nëpërmjet hyrjes kryesore nga “City Center”.
NJOFTIMI I POLICISË:
Në vijim të masave të marra në kuadër të Festës së Birrës-Gusht 2021, nisur nga fakti se fluksi i automjeteve në aksin rrugor Qafë Thanë-Korçë, është shumë i lartë, Policia apelon për të gjithë drejtuesit e mjeteve që të tregojnë kujdes, të respektojnë rregullat e qarkullimit rrugor, të respektojnë sinjalistikat vertikale dhe horizontale, të shmangin përdorimin e alkoolit dhe të celularit gjatë drejtimit të mjetit, të vendosin rripin e sigurimit me qëllim shmangien e ngjarjeve të mundshme rrugore.Patrullat e Policisë Rrugore dhe ato të Patrullave të Përgjithshme janë prezente në të gjitha akset rrugore, për të menaxhuar ngarkesën e trafikut, rritur sigurinë rrugore dhe duke ushtruar kontrolle për shpejtësinë me radar, për përdorimin e pijeve alkoolike me dragera, për dokumentacionin e nevojshëm dhe duke i ardhur në ndihmë çdo turisti të huaj apo vendas, me orientimin e duhur në lidhje me lëvizjen.
Rikujtojmë qytetarët se mbrëmjen e sotme, në këtë aktivitet do të lejohen të hyjnë vetëm personat të cilët janë të pajisur me biletë. Pranë vendit të quajtur “City Center”, këta shtetas do t’i nënshtrohen edhe një kontrolli fizik, ku nuk do të lejohet mbajtja e sendeve të ndaluara dhe më pas do të mund të hyjnë në brendësi të Terminalit, vetëm nëpërmjet hyrjes kryesore nga “City Center”. Shërbimet e Policisë, kanë siguruar dhe janë në marrje e vlerësim të çdo lloj informacioni për persona të cilët mund të kenë tendenca për veprime të dhunshme. Aktualisht janë duke u verifikuar disa shtetas, me qëllim sigurimin e rendit publik dhe mbarëvajtjen e eventit, deri në përfundim të tij.
/Priza.al/
