Kryeministri Edi Rama ka zhvilluar një bashkëbisedim me qytetarët në Facebook, ku ka deklaruar se qeveria e tij ka ulur me 10 fish, numrin e ndërtimeve pa leje në gjithë vendi. Po ashtu ai tha se duhet t’i japë një goditje përfundimtare këtij fenomeni.
Gjithashtu Rama theksoi se ndërtime pa leje ka edhe në vendet e tjera, ku mori si shembull Spanjën.
“Ndërtimet pa leje kanë qenë kanceri i këtij vendi, nuk janë më. Ka ndërtime pa leje nuk diskutohet. Por po të vijmë te katet pa leje, abuzim mbi lejen e ndërtimin e kemi ulur 10 fish. Po të bëheshin gjërat sa hap e mbyll sytë, nuk do kishte ardhur nevoja të ndryshonin kaq qeveri dhe të më vinte radha mua këtu. As do t’i vinte radha të tjerëve që do vijnë mbrapa. E vërteta është që sot jemi në kushte kur duhet t’i japim një goditje përfundimtare këtij fenomeni kaq të shëmtuar.
Kjo është një luftë që nuk ndodh vetëm në Shqipëri. Spanja e ka pasur këtë problem shumë vite më parë. ky është një problem që kërkon një zgjidhje. Për sa kohë ky sistem drejtësie nuk është akoma i pastruar plotësisht jemi të destinuar të turpërohemi”, tha ai.
