Në një akt të fundit normativ, Urdhri i Mjekëve ka ndryshuar rregullat për punën e mjekëve në Shqipëri. Nga data 1 gusht 2024, kufizimet e reja parashikojnë se një mjek nuk mund të punojë më shumë se 50 orë në muaj në sektorin privat, duke ndaluar kështu dypunësimin në spitale me autonomi. Për ata që shkelin këto rregulla, mund të aplikohen gjoba deri në 1 milion lekë, pezullim i licencës deri në 5 vjet ose heqje e plotë e licencës për ushtrimin e profesionit të mjekut.
Ndër ndryshimet e tjera, Urdhri i ri i Mjekëve ka vendosur se mjekët nuk lejohet të sugjerojnë pacientëve të drejtohen në spitalet jo publike ku ata punojnë. Po ashtu, është themeluar një komision apeli pranë Ministrisë së Shëndetësisë për të shqyrtuar ankesat dhe për të vendosur rreth masave disiplinore për shkeljet e kodit të etikës dhe deontologjisë mjekësore.
Këto ndryshime synojnë të rregullojnë dhe të përmirësojnë zbatimin e profesionit mjekësor në Shqipëri, duke adresuar çështjet e dypunësimit dhe konflikteve të interesit në shërbimet shëndetësore publike dhe private.
