Një anije e Marinës turke ka shtyrë një anije kërkimore greko-qipriote e cila sipas Ankarasë, kishte shkelur shelfin e saj kontinental në Mesdhe.
Agjencia e lajmeve “Anadolu” citon ministrinë turke të mbrojtjes, të pohojë se administrata greko-qipriote kishte lëshuar një “Navtex”, një mesazh paralajmërues lundrimi për aktivitet kërkimor në një zonë e cila përfshinte dhe shelfin kontinental të Turqisë.
Kjo e fundit u përgjigj duke i thënë se, aktiviteti duhet të ishte koordinuar me Ankaranë, e jo thjesht të vihej përpara faktit të kryer. Pavarësisht paralajmërimeve për të mos shkelur aty, anija kërkimore “Nautical Geo”, tentoi të kalonte.
Ajo fillimisht u paralajmërua nga marina turke, por pasi vazhdoi lundrimin, atëherë u shty jashtë shelfit kontinental.
Turqia, vendi me vijnë më të gjatë bregdetare në Mesdheun Lindor, nuk i pranon pretendimet e administratës greke dhe greko-qipriote për kufijtë detare, për të cilat thotë së janë të ekzagjeruara dhe shkelin të drejtat sovrane të Turqisë dhe të Qipros turke.
/Priza.al/
