Beygumjan Raeisi, nëna e gazetarit të vdekur të Radio Evropa e Lirë/Radio Liberty nga Irani, Reza Haghighatnejad, pretendon se agjentët iranianë të sigurisë rrëmbyen trupin e djalit të saj, i cili ishte duke u kthyer për në vend për varrim.
Hagigatnedjad (45) vdiq më 17 tetor në spitalin Charite në Berlin, Gjermani dhe trupi i tij u kthye në Iran për varrim më 25 tetor. Trupi i tij u zhduk pasi mbërriti në vend dhe e gjithë ngjarja u shoqërua me raporte të pakonfirmuara se agjentët e Gardës Revolucionare Islamike e çuan trupin në një vend të panjohur.
“Ky është një mesazh nga një nënë që nuk e ka parë djalin e saj për gjashtë vjet dhe nuk ka qenë në dijeni për sëmundjen e tij dhe tani që trupi është kthyer në Iran, autoritetet e kanë kapur atë në aeroport”, tha nëna e gazetarit. në një video të publikuar më 27 tetor.
Ajo nuk tha nëse kishte marrë konfirmim zyrtar se trupi i djalit të saj ishte marrë nga agjentët. Autoritetet iraniane nuk kanë komentuar mbi situatën.
Të afërmit dhe miqtë i thanë Radio Farda – ku Hagigatnejad punoi nga viti 2019 deri në vdekjen e tij – se janë siguruar të gjitha lejet e nevojshme që ai të varroset në qytetin e tij të lindjes, Shiraz, në Iranin jugor.
Hagigatnejad u largua nga Irani për shkak të presionit në rritje ndaj gazetarëve dhe filloi të punojë për mediat farsi jashtë vendit. Ai nuk mundi të kthehej në Iran për shkak të aktiviteteve të tij gazetareske.
Radio Farda mori gjithashtu informacione ku thuhej se familja e tij ishte nën presion nga autoritetet që të pranonin që trupi i tij të varrosej në një varrezë jashtë qytetit të tij.
Presidenti i Radios Evropa e Lirë Jamie Fly tha se manipulimi i familjes së Hagigatnejad nga regjimi iranian ishte “i turpshëm dhe i neveritshëm”, duke shtuar se ata meritojnë të lejohen ta varrosin atë pa u ngacmuar nga autoritetet.
