Ditën e nesërme ashtu sic dihet tanimë, Partia Demokratike e drejtuar nga “Rithemelimi” do të mbajë Kuvendin, ku pritet të jenë rreth 1,800 delegatë.
Gjatë mesditës së sotme, Garo publikoi edhe emrat e 420 anëtarëve.
Sekretari i Përgjithshëm i PD, Gazment Bardhi i cili përfaqëson krahun e Alibeajt nëpërmjet një postimi e quan Kuvendin e datës 30 Prill, si një akt përçarës të ish-kryeministrit Sali Berisha.
Postimi i Bardhit:
Nesër Sali Berisha ka lajmëruar një tjetër akt përçarës të Partisë Demokratike. Interesi i demokratëve është bashkimi dhe lufta e të gjithëve bashkë me Edi Ramën. Interesi i Sali Berishës është përçarja, zvogëlimi, lufta dhe armiqësia mes demokratëve dhe ndërtimi i një partie personale, që i shërben vetëm interesit të tij personal. Në vijim të ndërtimit të një partie personale, nesër sipas tij radhën e ka Këshilli Kombëtar. Qartësisht ajo që po bën Sali Berisha nuk ka lidhje me Partinë Demokratike.
Këshilli Kombëtar i PD është në detyrë, funksional, i regjistruar në gjykatë dhe me mandat që i përfundon më 17 Korrik 2025. Ndërtimi i strukturave paralele nga baza në qëndër, nuk është asgjë tjetër, vetëm nje akt turpi për të dëmtuar PD, për të mbajtur gjallë ndasitë mes demokratëve dhe për të shfokusuar PD nga beteja me regjimin e Edi Ramës.
