Një ngjarje e rëndë ka ndodhur ditën e sotme ku gjashtë emigrantë u gjetën të vdekur në det dhe disa të tjerë rezultojnë të zhdukur pasi anija e tyre u mbyt të hënën në brigjet algjeriane.
Sipas një televizioni lokal, nga mbytja kanë shpëtuar gjashtë emigrantë, përfshirë edhe një grua shtatzënë.
“Gjashtë persona janë mbytur dhe gjashtë të tjerë kanë shpëtuar përfshi edhe një grua shtatzënë. Ata u dërguan në spitalin Bainem në perëndim të Algjerit“, thuhet në raportim.
Varka, me shtetas nga vende të ndryshme të Afrikës Sub-Sahariane që përpiqeshin të kalonin Mesdheun, u përmbys rreth orës 4 të mëngjesit (0300 GMT) pranë Bainem, disa kilometra në perëndim të qendrës së qytetit të Algjerit.
Operacionet e kërkim-shpëtimit po vazhdojnë për gjetjen e personave të tjerë që rezultojnë të zhdukur.
