Shqipëria dhe Izraeli do të nënshkruajnë një marrëveshje të re bashkëpunimi në fushën e mbrojtjes.
Në vijim të vizitës së tij disaditore në Izrael, ministri i Mbrojtjes, Niko Peleshi, u prit në një takim zyrtar nga ministri i Mbrojtjes së Izraelit, Benjamin Gantz, me të cilin diskutuan mbi forcimin e marrëdhënieve mes dy vendeve në fushën e sigurisë.
Ministri Peleshi bëri një përshkrim të përgjithshëm të synimeve që ka vendi ynë për të ndërtuar dhe çuar në një nivel konkurrues kapacitetet në fushën e inovacionit teknologjik, duke ndjekur edhe modelin e Izraelit, si një nga pesë vendet lider të botë në këtë aspekt.
“Nga takimi me Ministrin e Mbrojtjes së Izraelit z. Benjamin Gantz – Vullnet i përbashkët për nënshkrimin së shpejti të një marrëveshjeje bashkëpunimi në fushën e mbrojtjes, për të çuar edhe më tej marrëdhëniet tona shumë të mira”, shkruan Ministri.
Gjatë takimit, Peleshi shprehu vlerësimin e tij për Izraelin si një partner shumë i rëndësishëm i NATO-s në rajonin e Lindjes së Mesme, si edhe për politikën konstruktive të ndjekur në Forumin e Dialogut të Mesdheut.
Ministri Peleshi falënderoi homologun Gantz për vendimin historik të njohjes së pavarësisë së Kosovës nga Shteti i Izraelit, që u pasua edhe me vendosjen e marrëdhënieve diplomatike dhe hapjen e ambasadave përkatëse.
/Priza.al/
