Një 29-vjeçar i identifikuar me inicialet E.P ka rënë në prangat e Policisë. I riu fillimisht nuk i është bindur patrullës për të ndaluar, ka rritur shpejtësinë e makinës dhe ka tentuar të largohet.
I riu rezulton një person me precedentë penal pasi ishte dënuar dhe më parë në Angli për disa vepra penale. Ai tashmë do të përballet me drejtësinë pasi akuzohet për dhënien e ndihmës për kalim të paligjshëm kufiri.
Mbi të do të rëndojë edhe akuza e mosbindjes ndaj urdhërit të Policisë ndërkohë që materialet procedurale i kanë kaluar Prokurorisë.
NJOFTIMI I POLICISË:
Elbasan/Finalizohet operacioni policor i koduar “Last time”, për goditjen e veprimtarisë kriminale në fushën e dhënies ndihmë për kalim të paligjshëm të kufijve.
Operacioni u zhvillua nga Seksioni për Hetimin e Trafiqeve të Paligjshme, në bashkëpunim me Seksionin e Forcës Operacionale dhe Forcën e Posaçme “Shqiponja”, në DVP Elbasan.
Nuk iu bind urdhrit të punonjësve të Policisë, për të ndaluar automjetin me të cilin transportonte 5 emigrantë të paligjshëm, vihet në pranga 29-vjeçari, përsëritës i veprave penale “Ndihma për kalim të paligjshëm të kufijve” dhe “Mosbindja ndaj urdhrit të punonjësit të policisë”.
29-vjeçari i arrestuar, i dënuar më parë, në Angli, për disa vepra penale.
Specialistët për Hetimin e Trafiqeve të Paligjshme në DVP Elbasan, në bashkëpunim me Seksionin e Forcës Operacionale dhe Forcën e Posaçme “Shqiponja”, në DVP Elbasan, bazuar në informacionet e siguruara se një person me rrezikshmëri shoqërore po transportonte emigrantë të paligjshëm, kanë organizuar dhe finalizuar operacionin policor të koduar “Last time”, si rezultat i të cilit u arrestua në flagrancë shtetasi:
E. P., 29 vjeç, banues në Tiranë.
Në aksin rrugor Elbasan – Peqin, shërbimet e Policisë i kanë bërë shënjë ndalimi automjetit tip “Hyundai”, me drejtues shtetasin E. P., i cili nuk e ka ndaluar automjetin, por ka tentuar të largohet me shpejtësi dhe për pasojë ka dalë nga rruga kryesore.
Pas ndekjes nga Policia, ky shtetas është ndaluar së bashku me automjetin që drejtonte, me të cilin po transportonte 5 emigrantë të paligjshëm, kundrejt fitimit, me qëllim kalimin drejt vendeve të BE-së.
Materialet i kaluan Prokurorisë, për veprime të mëtejshme procedurale, për veprat penale “Ndihma për kalim të paligjshëm të kufijve” dhe “Mosbindja ndaj urdhrit të punonjësit të policisë së rendit publik”.
