I ftuar në emisionin ‘Open’, përballe gazetarëve dhe analistëve, kreu i qeverisë theksoi se nisma ‘Ballkani i Hapur’ ndalon riprodhimin e historisë.
Ai tha se me Ballkanin e hapur ngelen pas të gjitha ngërçet dhe nuk merret njeri me targa. Rama tha se nuk e sheh si një lojë boksi marrëdhënien mes Kosovës dhe Serbisë por si një lojë shahu.
“Që Serbia duhet të kërkojë falje nuk ka diskutim. Çështja është kur dhe si e kërkon faljen…Do e kërkojë duke qëndruar neve në mënyrë pasive dhe pritur faljen, apo do e kërkojë në një proces? Nuk ka ku shkon pa kërkuar falje, por falja vjen si përfundim i marrëveshjes, jo si prezumim i marrëveshjes se kjo nuk ka ndodhur kurrë në historinë e marrëveshjeve. Ballkani i hapur e ndalon njëherë e përgjithmonë riprodhimin e historisë për arsye të politikave të brendshme të një vendi.
Me Ballkanin e hapur ngelen pas të gjitha këto dhe nuk merret njeri me targa. Ne kërkojmë një hapje të mundësive për bizneset që të bëjnë biznes. Duhet të rrisim hapësirat e mirëqenies së njerëzve. Ballkani i hapur është procesi i Berlinit i marrë përsipër nga ne vetë. Mendoj se dialogu me Serbinë është shah dhe nuk është boks. Kosova mbetet peng i atij boksi. Kjo është shah. Kosova e ka fituar luftën, shqiptarët e fituan. Serbët e humbën, del një gjeneral aty kloun që t’i japë zemër bijve të të mundurve.”
/Priza.al/
