Pasi ankimuan vendimin e lënies në burg, “miqtë” dhe ushtarët e Nuredin Dumanit do të vijojnë të qëndrojnë në qeli, kështu vendosi Apeli i Gjykatës Kundër Krimit dhe Korrupsionit.
Apeli i GJKKO-së ka lënë në fuqi masën e arrestit me burg shtetasit Ilirian Feçi, Fatos Gosa (Tos Gosa), Elvis Koçi (Çaushllari), Adrian Uzuni, Altin Ndoci, Petrit Qoli, Agron Qoli, Gentian Sharra, të cilët u arrestuan pasi Nuredin Dumani u bë i penduar i drejtësisë dhe iu nxori emrat.
Njoftimi i GJKKO:
KOMUNIKIM PËR MEDIAN
Komunikohet në mënyrë të përmbledhur se, sot më datë 27.06.2022, në Gjykatën e Posaçme të Apelit për Korrupsionin dhe Krimin e Organizuar, u shpall vendimi lidhur me çështjen nr. 24, datë 20.06.2022 regjistrimi, me objekt “ankim ndaj vendimit të caktimit të masës së sigurimit personal”, në ngarkim të personave nën hetim I.F., F.G. (T.G.), E.K. (Ç.), A.U., A.N., P.Q., A.Q., G.Sh., ku trupi gjykues monokratik i përbërë nga gjyqtarja Daniela Shirka, vendosi:
- Miratimin e vendimit nr. 42, datë 17.05.2022 dhe vendimit nr. 48, datë 21.05.2022 të Gjykatës së Posaçme të Shkallës së Parë për Korrupsionin dhe Krimin e Organizuar për personat nën hetim F.G. (T.G.), E.K. (Ç.), A.U., A.N., P.Q., A.Q., G.Sh.
- Miratimin e vendimit nr. 48, datë 21.05.2022 të Gjykatës së Posaçme të Shkallës së Parë për Korrupsionin dhe Krimin e Organizuar për personin nën hetim I.F.
- Ndalimin e publikimit të vendimit në referim të nenit 103 të K.Pr.Penale.
Operacioni “Plumbi i Artë”, filloi pas arrestimit të Nuredin Dumanit dhe Henrik Hoxhajt në 30 mars në qytetin e Fierit. Të gjendur para shumë provash, të dy të arrestuarit vendosën të bashkëpunonin me SPAK, dhe falë dëshmive të tyre, janë zbuluar një sërë ngjarjesh kriminale të ndodhura në 10 vitet e fundit. Po ashtu në kuadër të këtij operacioni u lëshuan edhe 32 masa arrestit, ndërsa u ekzekutuan 14, ndërsa 18 shtetas u shpallën në kërkim, ndër ta personazhe të njohur të botës së krimit.
