Sri Lanka ka pezulluar shitjet e karburantit për automjetet jo thelbësore pasi po përballet me krizën e saj më të keqe ekonomike në dekada.
Për dy javët e ardhshme vetëm autobusët, trenat dhe automjetet që përdoren për shërbime mjekësore dhe transport ushqimi do të lejohen të mbushen me karburant.
Shkollat në zonat urbane janë mbyllur dhe zyrtarët u kanë thënë 22 milionë banorëve të vendit që të punojnë nga shtëpia.
Kombi i Azisë Jugore është në bisedime për një marrëveshje shpëtimi, ndërsa lufton të paguajë për importe të tilla si karburantet dhe ushqimet.
Të hënën, qeveria tha se do të ndalojë automjetet private të blejnë benzinë dhe naftë deri më 10 korrik.
Një zëdhënës i kabinetit të Sri Lankës, tha se Sri Lanka “nuk është përballur kurrë me një krizë kaq të rëndë ekonomike në historinë e saj”.
Vendi me para të kufizuara ka dërguar gjithashtu zyrtarë te prodhuesit kryesorë të energjisë Rusia dhe Katari në një përpjekje për të siguruar furnizime të lira të naftës.
Javën e kaluar, një ekip nga Fondi Monetar Ndërkombëtar mbërriti në Sri Lanka për bisedime mbi një marrëveshje shpëtimi prej 3 miliardë dollarësh (2.4 miliardë £).
Qeveria po kërkon gjithashtu ndihmë nga India dhe Kina për të importuar artikuj thelbësorë.
Në javët e fundit, qeveria u ka bërë gjithashtu thirrje fermerëve që të kultivojnë më shumë oriz dhe u ka dhënë zyrtarëve qeveritarë një ditë pushimi shtesë.
