Policia e Tiranës ka bërë të mundur arrestimin e shtetasit Iljaz Meçani pasi dhunoi dhe kanosi me armë vëllain dhe dajën e tij. 31-vjeçari rezulton i dënuar më parë për vjedhje.
Në banesën e të arrestuarit, blutë gjetën dhe sekuestruan 1 armë zjarri tip pistoletë, 1 armë zjarri tip automatik, 2 krehra dhe municion luftarak.
Efektivët e policisë parandaluan kështu një tjetër krim në familje, që mund të kishte lënë pasoja të rënda.
Njoftimi i policisë:
Falë ndërhyrjes në kohë të shërbimeve të Komisariatit të Policisë Nr. 3, u parandalua një ngjarje e rëndë kriminale në familje.
Finalizohet operacioni policor i koduar “Safe”, sekuestrohen 2 armë zjarri dhe municion luftarak.
Ushtroi dhunë fizike dhe kanosi me armë zjarri vëllanë e tij dhe dajën, arrestohet në flagrancë 31-vjeçari.
Shërbimet e Komisariatit të Policisë Nr. 3, pas njoftimit për një shtetas që mbante armë zjarri në banesë dhe kanoste familjarët e tij, kanë organizuar dhe finalizuar operacionin policor të koduar “Safe”, për të parandaluar ngjarjen e mundshme kriminale.
Falë ndërhyrjes në kohë, shërbimet e Policisë kanë arrestuar në flagrancë shtetasin I. M., 31 vjeç, banues në Tiranë, i dënuar më parë për vjedhje.
Nga veprimet hetimore dyshohet se ky shtetas ka ushtruar dhunë fizike në mënyrë të përsëritur ndaj vëllait të tij dhe dajës së tyre, si dhe i ka kanosur ata me armë zjarri, për motive të dobëta.
Gjatë kontrollit në ambientet e banesës së shtetasit I. M. janë gjetur të fshehura 1 armë zjarri pistoletë, 1 armë zjarri automatik, 2 krehra dhe municion luftarak.
Materialet i kaluan Prokurorisë, për veprime të mëtejshme.
