Michael Schumacher u ankua për kushtet e dëborës në Alpe dhe i sugjeroi familjes së tij të udhëtonin në Dubai, pak para se të ndodhte aksidenti tragjik i cili e la atë me një dëmtim pothuajse fatal të trurit. Prej 8 vitesh kampioni i “Formula 1” është ende në gjende kome që nga aksidenti i rëndë që pësoi teksa bënte ski në vitin 2013.
Gruaja e tij, Corinna ka folur për herë të parë rreth gjendjes së ikonës së Formula 1 duke thënë: “Më mungon Michael çdo ditë. Por nuk më mungon vetëm mua. I mungon fëmijëve, familjes, babait të tij dhe shumë personave të tjerë. Michael është këtu – ndryshe, por është këtu. Ai ende më tregon se sa i fortë është çdo ditë.”
Corinna ka vendosur të tregojë detaje në lidhje me gjendjen e Schumacher, tani që pritet dhe publikimi i dokumentarit të tij ne ‘Netflix’. Ajo tha se nuk e kishte menduar kurrë që burrit të saj t’i ndodhte një aksident i tillë.
Corinna dhe Michael u martuan në vitin 1995 dhe kanë dy fëmijë së bashku, Gina, 24 vjeç dhe Mick, 22 vjeç, i cili ka ndjekur babanë e tij në F1. Të dy fëmijët shfaqen në dokumentar. Mick ishte me Michael kur ai pësoi aksidentin tragjik në 2013 dhe tha se ai do të “hiqte dorë nga gjithçka” nëse do të kishte mundësinë për të folur njëherë të vetme me babanë e tij.
“Unë mendoj se jam jashtëzakonisht me fat që kam takuar Michael. Ai është personi më i dashur që kam takuar ndonjëherë”, -u shpreh gruaja e Schumacher.
Dokumentari i 52-vjeçarit do të përfshijë intervista me disa anëtarë të familjes së Schumacher, përfshirë babanë e tij Rolf dhe vëllanë Ralf, si dhe figura të njohura të garave si Jean Todt, Bernie Ecclestone, Sebastian Vettel, Mika Häkkinen, Damon Hill, Flavio Briatore dhe David Coulthard.
/Burimi:DailyMail/Përshtati:Priza.al
