Së fundmi, WhatsApp ka prezantuar një veçori të re përmes përditësimit më të fundit për përdoruesit në telefonat Android. Funksioni i ri e bën më të lehtë për përdoruesit që të ndajnë një numër të madh fotografish me miqtë dhe familjen e tyre nga galeria e smartfonëve.
Me përditësimin më të fundit, WhatsApp lejon përdoruesit të ndajnë deri në 100 foto dhe video në të njëjtën kohë. Ky numër më parë ishte i kufizuar vetëm në 30 foto. Për shumë, ky ishte një nga kufizimet më të bezdisshme të ndarjes së fotografive në WhatsApp.
Ndryshime të tjera zyrtare kanë të bëjnë me vendosjen e titujve në dokumentet që dërgoni apo me rritjen e sasisë së karaktereve për objektin dhe përshkrimin e grupeve, duke ju dhënë mundësi t’i përshkruani më mirë.
Kujtojmë që disa javë më parë WhatsApp bëri përditësime të rëndësishme të statusit me mbështetjen për shënimet zanore. Ndërkohë së fundmi qarkullon edhe lajmi se aplikacioni Meta së shpejti mund t’i lejojë përdoruesit të transkriptojnë mesazhet zanore të marra nga përdoruesit.
WhatsApp gjithashtu ka prezantuar disa përditësime të reja në veçorinë Status, e cila u prezantua në vitin 2017, si përgjigje ndaj Snapchat dhe Instagram Stories. Një nga risitë kryesore është “Statusi i Zërit”, i cili i lejon përdoruesit të regjistrojë mesazhet deri në 30 sekonda dhe t’i vendosë ato si statusin e tyre. Kompania thotë se është një mënyrë më “personale” për të njoftuar kontaktet, veçanërisht për përdoruesit që zakonisht preferojnë të flasin në vend që të regjistrojnë video.
