Hapësirat publike në kryeqytetin e Kosovës shumë shpejt do të vëzhgohen nga kamerat, kështu bëri të ditur kryetari i Prishtinës, Përparim Rama.
Përmes një postimi në rrjete sociale Rama tha, se sot u nënshkrua marrëveshja me Policinë për vendosjen e sistemit të kamerave.
“Tash e sa kohë jemi në bashkëpunim të ngushtë me Policinë e Kosovës për hartimin e marrëveshjes për vendosjen e sistemit të kamerave dhe mënyrën e mirëmbajtjes së rrjetit të kamerave në hapësirat publike të Kryeqytetit, marrëveshje e cila u nënshkrua sot”, tha Rama.
Ai theksoi se së bashku me organet e rendit do të realizojnë aktivitete të përbashkëta për sigurinë në kryeqytet.
“Bashkë me Policinë e Kosovës u zotuam se do të koordinojmë aktivitete të përbashkëta për përmirësimin e sigurisë në hapësirat publike të Kryeqytetit”, shtoi Rama .
Vendimi vjen pas ngjarjes së rëndë, ku 5 persona abuzuan me një 11-vjeçare në një park në Prishtinë.
