Kreu i PD-së Sali Berisha ka folur nga selia e PD për vendimin e Alibeajt për përjashtimin e 4 deputetëve të PD nga grupi parlamentar.
Berisha e cilësoi Alibeajn zbatues mjeran të urdhrave të Edi Ramës dhe i keqpërdorur prej tij.
“Jam marrë me probleme krejt të tjera sot. Zbatonjësi mjeran i urdhrave të Edi Ramës…I keqpërdorur në shkallën më ekstreme nga Edi Rama. Zbatoi një urdhër të Edi Ramës duke shkelmuar dhe më shumë mbi dinjitetin e tij.
E ardhmja e grupit parlamentar, do jetë një grup kompakt, i cili do të mbrojë me gjithë potencialin e vet interesat e qytetarëve. Do bëjë gjithçka për të shumëfishuar kontrollet”, tha Berisha.
Ai u ndal më tej te rast i vjedhjes së ish-zyrtares së kryeministrisë Alda Klosi. Berisha theksoi se ka një shpërthim të këtij llumi në mënyrë më të paimagjinueshme dhe akuzoi Ramën se donte të fshihte emrin e saj.
“Kjo qeveri nuk ka se ku ta kapësh më parë. Rasti i Alda Klosit mund të jetë secila nga ministret, secila nga ministrat, vetë Edi Rama, emra të tjerë. Vjen zonja me 40 metra katrorë apartament dhe bëhet me 7 apartamente, lumturon dhe të tjerë përreth saj. Ka një shpërthim të këtij llumi në mënyrë më të paimagjinueshme, më të pakonceptueshme.
Ajo që ishte po kaq përpjekja e Edi Ramës për ta fshehur emrin e Alda Klosit. Emri i Alda Klosit më është dërguar nga qytetari dixhital sapo doli skandali.
Po përpiqej të përdorej e njëjta skemë me Giknurin, Spiropalin, Ilir Beqjan e me radhë”, tha ai.
Sa i përket emrit të Ervin Salianjit si i propozuar për kreun e grupit, Berisha tha se do pranojë vullnetin e deputetëve të PD.
“Salianji është nënkryetar, kështu që unë do pranoj vullnetin e deputetëve të PD. Por u ndala në detyrat e mëdha që kanë. Ju e morët vesh skandalin e fundit të Veliajt që hapte tendera për të vjedhur vetë. Mos kujtoi se është rasti izoluarit, do mësoni shumë në të ardhmen për këtë person që nuk ka të ngopur. Ajo bashki noton në episode të tilla. Detyrat e opozitës janë të shumta sot”, u shpreh Berisha.
