Drejtori i Zyrës për Kosovën në Qeverinë e Serbisë, Petar Petkoviq, ka deklaruar se vendimi i kryeministrit të Kosovës Albin Kurti për riregjistrimin e targave është i paligjshëm dhe i dhunshëm dhe se qëllimi i tij kryesor është të “shtypë” ekzistenca e serbëve në Kosovë.
“Kurti ka marrë një vendim të kundërligjshëm që serbët, të cilët kanë targa KM, të riregjistrohen me targa RKS, që është në kundërshtim me të gjitha marrëveshjet që kemi pasur deri më tani”, tha Petkoviq për Radio Televizionin e Serbisë.
Ai ka përsëritur se Kurti dëshiron t’i frikësojë serbët atje, por se Serbia nuk do të lejojë asnjë pogrom.
Më 28 tetor, kryeministri i Kosovës, Albin Kurti prezantoi një plan për targat e lëshuara nga autoritetet serbe për qytetet e Kosovës, sipas të cilit pronarët e veturave të tilla do të paralajmërohen nga 1 nëntori dhe kjo masë do të zgjasë tre javë deri më 21 nëntor.
Pas kësaj, gjobat do të jepen deri më 21 janar 2023 dhe pas kësaj periudhe do të jepen targat e provës edhe për dy muaj të tjerë.
Nga data 21 prill 2023, siç tha Kurti, nuk do të lejohet qarkullimi i veturave me targa të ndryshme nga RKS (Republika e Kosovës).
Afati i Qeverisë së Kosovës për riregjistrimin e veturave me targa serbe, të cilat janë të paligjshme për Kosovën, skadon më 31 tetor të këtij viti.
Bëhet fjalë kryesisht për targa KM , të cilat janë të paligjshme për Kosovën, por që deri më tani janë toleruar në komunat me shumicë serbe në veri të Kosovës – Severna Mitrovicë, Leposaviq, Zveçan dhe Zubin Potok.
Nga rreth 10,000 makina me targa të tilla, rreth 20 janë riregjistruar në RKS.
Më 31 tetor, Petar Petkoviq tha për RTS se serbët në Kosovë, kryesisht në veri, siç tha ai, nuk duan targa të tjera.
“Këto janë targa të lëshuara nga Republika e Serbisë, ata nuk duan targa të tjera sepse Kurti, por edhe ata që mbështesin të ashtuquajturën Kosovë të pavarur duhet ta kuptojnë se serbët në Kosovë dhe Metohi ndihen si qytetarë të Republikës së Serbisë dhe askush nuk ka të drejtë t’i anulojë targat tona serbe, sepse në fakt është qëllimi dhe plani i vërtetë i Albin Kurtit për ta shtyrë ekzistencën e shtetit të Serbisë jashtë territorit të Kosovës dhe Metohisë, dhe qëllimi përfundimtar është dëbimi i popullit tonë. ”, theksoi Petkoviq.
Ai ka theksuar se ky vendim është “absolutisht i papranueshëm” për autoritetet në Serbi dhe se ai ndryshon vetëm në kuptimin e disa fazave të prezantuara nga kryeministri i Kosovës, por që në thelb gjithçka mbetet e njëjtë.
“Ai dëshiron që deri më 21 prill të vitit të ardhshëm t’i heqë plotësisht targat KM dhe të fillojë të konfiskojë veturat, pra pronën private të atyre që nuk riregjistrohen siç e ka paraparë Albin Kurti”, shton Petkoviq.
