32-vjeçari, Tefik Shehu, është arrestuar sot nga policia e Durrësit. Ai është vënë në pranga në lidhje me ngjarjen e 9 dhjetorit ku në dhomën e një hoteli në autostradën Durrës-Tiranë, mbeti i plagosur me armë zjarri një 20-vjeçar, Arni Sulejmani.
“Specialistët për Hetimin e Krimit në DVP Durrës kanë bërë kapjen dhe ndalimin e shtetasit në kërkim Tefik Shehu., 32 vjeç, banues në Durrës, të cilin Gjykata e Shkallës së Parë Durrës, më datë 10.12.2021, i ka caktuar masën e sigurisë “Arrest në burrg”, për veprën penale “Moskallëzim krimi”, në lidhje me ngjarjen e ndodhur më datë 09.12.2021, në ambientet e dhomës së një hoteli në autostradën Durrës-Tiranë, ku mbeti i plagosur me armë zjarri një 20-vjeçar, Arni Sulejmani,” njofton policia.
Dyshohet se i riu u plagos pa dashje nga 26-vjeçari Markeljan Beqiri. Autoritetet po punojnë për zbardhjen e plotë të ngjarjes.
/Priza.al/
