Polonia ka një pikë më pak se sa Shqipëria në “Grupin I”, kualifikues për në Botërorin “Katar 2022”. Duke qenë se polakët janë ndeshur dy herë me Anglinë dhe Hungarinë, e tashmë presin në Varshavë, janë të bindur se dueli me Shqipërinë është vendimtar.
Të tillë e klasifikon edhe sulmuesi i “Bayern Munchen”, Robert Lewandowski, i cili në konferencën e fundit për shtyp, i’u referua ndeshjes së parë dhe foli për Shqipërinë, ku theksoi se, kombëtarja polake duhet të ketë kujdes.
“Duke parë ndeshjen tonë të parë, u kemi lejuar atyre shumë territor. Duhet të fokusohemi në maksimum dhe të shohim gabimet që bëmë në ndeshjen e parë me ta.
Shqipëria ka shumë lojtarë të rëndësishëm e të njohur në Europë dhe duhet t’i respektojmë. Nëse dëshirojmë që të shkojmë në ‘play off’, duhet të fitojmë patjetër me Shqipërinë. Gjërat varen nga ne, e kemi vetë fatin në dorë dhe të mos presim rezultatet e rivalëve të tjerë”,- tha ndër të tjera Lewandowski.
Polonia fillimisht do të luajë me San Marinon në Varshavë më 9 tetor dhe më 12 tetor, vjen në Tiranë për t’u përballur me Shqipërinë, sfidë që do të luhet në stadiumin “Air Albania” në orën 20:45.
/Priza.al/
