Një ngjarje e rëndë ka ndodhur në Shkup të Maqedonisë ku tre persona janë vënë në pranga pasi dyshohen për abuzim dhe tregti me fëmijë.
Njëri prej të arrestuarve është baba i gjashtë fëmijëve dhe dyshohet se për një kohë të gjatë ai ka përdhunuar njërën nga vajzat e tij. Njëkohësisht, e dyshuara e dytë , si nënë e fëmijës që nuk ka mbushur 14 vjet, në këmbim të parave e ka detyruar vajzën që të kryej marrëdhënie intime me të dyshuarin e tretë.
Përveç kësaj, babai i ka shitur vajzën një burri nga Kosova, që e ka gjetur përmes internetit.
“Pas pagesës prej 3.000 eurove, vajza është dërguar në Kosovë për martesë të detyruar. Pas dy muajsh ajo ka ardhur për të vizituar prindërit e saj, ndërsa i dyshuari i parë, duke u arsyetuar se ishte shumë larg, nuk e ka kthyer në Kosovë”, thuhet mes tjerash në njoftimin e Prokurorisë.
Tre të dyshuarve sot me propozim të Prokurorisë Themelore Publike për Ndjekjen e Krimit të Organizuar dhe Korrupsionit iu është caktuar masa e paraburgimit prej 30 ditëve ndërsa për të miturit do të kujdeset nga Qendra Ndërkomunale për Çështje Sociale – Shkup.
/Priza.al/
