Rusia goditi me raketa të martën fabrikën e çelikut “Azovstal” në Mariupol, një zhvillim që erdhi pas prishjes së armëpushimit të ndërmjetësuar nga OKB. Ndërkohë në fabrikë ka ende civilë që vazhdojnë të jenë të bllokuar. Megjithatë, disa dhjetëra të evakuuar që arritën të largoheshin nën kujdesin e OKB-së dhe Kryqit të Kuq në fundjavë, kanë mbërritur në një zonë relativisht më të sigurt, në qytetin e Zaporizhias, nën kontrollin e Ukrainës.
Njerëz me pamje të lodhur, mes tyre fëmijë e të moshuar, zbritën nga autobusët pasi shpëtuan nga rrënojat e qytetit të tyre në juglindje të Ukrainës, të cilin Rusia pretendon se e kontrollon. Osnat Lubrani, koordinatori humanitar i OKB-së për Ukrainën, tha se 101 të evakuuar që ishin nisur nga Mariupoli, kishin arritur në Zaporizhia të martën.
Rusia e ka përqëndruar sulmin në lindje dhe jug të Ukrainës që nga dështimi për të marrë Kievin, në mars. Por ajo ka goditur gjithashtu edhe rajone të tjera, në perëndim, në një përpjekje për të kufizuar daljen e Ukrainës në Detin e Zi, jetike për eksportet e saj të grurit dhe metaleve, dhe gjithashtu për të ndërprerë furnizimet me ndihmë ushtarake perëndimore për forcat e Presidentit Volodymyr Zelenskiy.
Të martën, Ministria ruse e Mbrojtjes e Rusisë tha se forcat e saj kishin goditur me raketa një aeroport ushtarak pranë portit të Odesës, duke shkatërruar dronë, raketa dhe municione të furnizuara nga Shtetet e Bashkuara dhe aleatët evropianë të Kievit. Kur janë shënuar rreth 10 javë nga fillimi i luftës që ka shkaktuar vdekjen e mijëra vetëve, ka shkatërruar qytete si dhe ka detyruar pesë milionë ukrainas të largohen nga vendi, Presidenti rus Vladimir Putin kërcënoi mbështetësit e Kievit të martën, duke njoftuar planet për të bllokuar eksportin e lëndëve të para jetike ruse.
Ndërkohë Bashkimi Evropian njoftoi se po përgatitet për sanksione të reja ndaj Rusisë që kanë në shënjestër industrinë e saj të naftës dhe bankat. Kongresi amerikan po shqyrton një paketë ndihme ushtarake prej 33 miliardë dollarësh dhe Kryeministri britanik Boris Johnson njoftoi një ndihmë ushtarake prej 375 milionë dollarësh.
Në një telefonatë të martën Presidenti francez Emmanuel Macron i kërkoi zotit Putin të urdhërojë një armëpushim të menjëhershëm në Ukrainë dhe të heqë embargon e Rusisë ndaj eksporteve të Ukrainës që kryhen përmes Detit të Zi. Kremlini njoftoi se zoti Putin ka thënë se Rusia mbetet e hapur për dialog. Kancelari gjerman Olaf Scholz i cilësoi politikat e Vladimir Putinit imperialiste dhe tha se ai do të mbështeste Finlandën dhe Suedinë, nëse ato do të merrnin vendim t’i bashkoheshin NATO-s./VOA
