Kreu i PD, Sali Berisha ka akuzuar kryeministrin Edi Rama si rreziku më i madh për sigurinë e Shqipërisë, rajonit dhe më gjerë.
Gjatë fjalës së tij në protestë, Berisha tha se importet nga Kolumbia në vendin tonë janë rritur 60 herë duke e kthyer Shqipërinë në një Kolumbi të dytë. Më tej ai i ka kërkuar Ramës të japë dorëheqjen pasi po nxin imazhin e të gjithë shqiptarëve.
“Revolucioni ynë do të fitojë! Sot Shqipëria shihet si një vend ku mafia dhe kartelet e drogës pastrojnë paratë e krimit. Në dy vitet e fundit, importet nga Kolumbia janë rritur 60 herë për të shndërruar këtë tokë të bekuar, në një Kolumbi të dytë për Europën.
Edi Rama, ti je një rrezik madhor për sigurinë e Shqipërisë, rajonit dhe më gjerë.
Jep dorëheqjen dhe largohu me organizatën tënde kriminale. Pse duhet të durojnë shqiptarët të durojnë këtë poshtërim, këtë nxirje të imazhit të kombit? Imagjinoni sikur të ndodhë që një njeri si ky, të bëjë hapin në samitin e NATO-s, çfarë do të ndodhë me Shqipërinë dhe shqiptarët? Shqipëria dhe shqiptarët do skuqen nga turpi. Edi Rama, ik, largohu, jep dorëheqjen!”, tha Berisha.
