Izolimi që po i bëhet Shqipërisë nga vendet e BE-së duke mbajtur të bllokuar lëvizjen e lirë të qytetarëve, me pretekstin e pandemisë, ka nisur të iritojë dhe zëmërojë jo vetëm shqiptarët brenda vendit.
Edhe emigrantët shqiptarë, sidomos ata që jetojnë dhe punojnë në shtetet fqinje me Shqipërinë, nuk po arrijnë që të kuptojnë arsyen se përse kufijtë e vendit tonë po mbahen të bllokuar dhe po ashtu edhe lëvizja e shqiptarëve.
Për këtë emigrantët jashtë Shqipërisë kanë vendosur që të reagojnë dhe të organizohen edhe në protesta, dhe duket se të parët do të jenë ata të komunitetit shqiptar të Greqisë.
Pikërisht ky komunitet në Greqi, ka lajmëruar se do të organizojë sot një protestë paqësore në sheshin “Sintagma” për hapjen e kufijve. Protesta është paralajmëruar të mblidhet në orën 18:00.
Ky vendim vjen në një kohë ku autoritetet greke vijojnë të shtyjnë hapjen e kufijve dhe mbajtjen në fuqi të masave kundër sëmundjes, ku parashikohet që në dogana të kalojë vetëm një numër i kufizuar personash.
Ja komunikata e shpërndarë sot në rrjet nga komuniteti shqiptar i Greqisë:
“Hapni tani doganat!
Mos na refuzoni shtëpinë tonë!
Edhe një herë tjetër si emigrantë shqiptarë dhe qytetarë të Greqisë ndiejmë nevojën kaq shumë të kemi një Zë të lartë, të fuqishëm dhe të fortë…!
Përse qeveria greke mban mbyllur kufirin me Shqipërinë dhe ka kufizuar në mënyrë asfiktike numrin e hyrjes në Greqi, ndërkohë që me shtetet e tjera ndodh krejtësisht e kundërta?
Përse ky dallim të bëhet vetëm me shqiptarët dhe i detyron ata të gjejnë zgjidhje të tjera?
Përse në këtë moment kur kufizimi i hyrjeve ndëshkon edhe vetë fermerët grekë të cilët janë në pritje të mijëra punëtorëve të kualifikuar sezonalë që vijnë nga Shqipëria?
Përse ky dallim edhe ndaj minoritarëve grekë?
Përse duhet të “ndëshkohen” me mijëra biznese nga të dy anët e kufirit të cilët kontribuojnë në ekonominë e vendit?
Ju bëjmë thirrje të gjithëve pa përjashtim dhe dallim, të mblidhemi më 8/06/2021 në sheshin “Sintagma” të kërkojmë të drejtat tona në mënyrë Demokratike në një protestë Paqësore.
Të dëgjohet zëri ynë nga qeveria greke, të cilës ne i bëjmë thirrje të rishikojë qasjen e padrejtë ndaj nesh, qytetarëve të saj, pasi vazhdon me penalizmin duke mbajtur mbyllur pikat doganore dhe kështu na privohet një e drejtë themeltare për të udhëtuar drejt vendlindjes dhe anasjelltas në vendin ku kemi zgjedhur të jetojmë dhe ndërtuar jetën tonë, Greqi!
I bëjmë thirrje çdo qytetari, bashkatdhetari, intelektuali, organizate, shoqate etj., të organizohemi dhe të protestojmë në mënyrë demokratike, pasi nga qeveria shqiptare nuk kemi pasur asnjëherë mbështetje!
Mos mungoj askush, të gjithë së bashku më 8/06/2021 në sheshin “Sintagma”!-, është lajmërimi që ky komunitet ka postuar në rrjetin social Facebook.
Ditën e mërkurë më 9 qershor, Komiteti i Ekspertëve në Greqi, do të mblidhet për të lehtësuar një sërë masash, në mënyrë që të përshpejtohet hapja dhe kthimi në normalitet.
Mes masave që priten të lehtësohen, do të jetë edhe shtimi i kuotave në pikat kufitare me Shqipërinë.
/Priza.al/
