Kompania amerikane Affinity Partners, e sipërmarrësit amerikan Jared Kushner, dhëndri i ish-presidentit Donald Trump, synon të realizojë dy projekte të mëdha turistike në Shqipëri dhe një në Serbi, që shkojnë në një vlerë rreth 1 miliard dollarë. Në një artikull të gjatë New York Times flet për projektet e zotit Kushner në Shqipëri. Ja çfarë shkruan gazeta amerikane!
“Jared Kushner, dhëndri i Donald J. Trump, konfirmoi të premten se ai po mbyllte marrëveshje të mëdha të pasurive të paluajtshme në Shqipëri dhe Serbi.
Një nga projektet e propozuara do të ishte zhvillimi i një ishulli në brigjet e Shqipërisë në një destinacion turistik luksoz. Një tjetër projekt do të ndërtohej në gadishullin e Zvërnecit, një zonë bregdetare prej 1000 hektarësh në jug të Shqipërisë që është pjesë e qytetit turistik të njohur si Vlorë, ku do të ndërtohen disa hotele dhe qindra vila.
Z. Kushner dhe zonja Trump vizituan Shqipërinë dy herë që kur zoti Trump u largua nga detyra. Ata vizituan vendin me zotin Richard Grenell, madje u takuan edhe me kryeministrin e Shqipërisë.
Z. Kushner dhe znj. Trump, së bashku me z. Grenell, janë fokusuar pjesërisht në Sazan, një ishull mesdhetar në jug të Shqipërisë që deri në fund të Luftës së Ftohtë ishte përdorur nga Bashkimi Sovjetik dhe nga komunistët si bazë ushtarake e fshehtë për nëndetëset. Plani është që në ishull të ndërtohet një hotel dhe vila luksoze. Korrikun e kaluar zoti Grenell së bashku me Ivanka Trump dhe zotin Kushner u takuan edhe me zotin Rama në Tiranë, kryeqytetin e Shqipërisë dhe u fotografuan të gjithë bashkë. Zoti Rama ka bërë presion prej afro një dekade për ta hapur Sazanin drejt rizhvillimit si destinacion turistik, si dhe kërkon mënyra të tjera për të tërhequr investitorë të huaj në Shqipëri për të zgjeruar ekonominë e saj turistike, informon dritare.net
Z. Kushner dhe z. Grenell kanë bashkëpunuar ngushtë me një biznesmen miliarder shqiptar të quajtur Shefqet Kastrati dhe djalin e tij, Musa Kastrati. Investimet e tyre përfshijnë një koncesion për të drejtuar aeroportin ndërkombëtar në Tiranë, një zinxhir pikash karburanti në Shqipëri dhe hotele dhe biznese të tjera, sipas bashkëpunëtorëve të biznesit dhe zotit Kushner.
“Ata na kanë ndihmuar të kuptojmë koston e ndërtimit dhe si të operojmë në nivel lokal”, tha zoti Kushner në një intervistë.
Në tetor 2022, Shefqet Kastrati bleu një shtëpi prej 7.5 milionë dollarësh në Indian Creek, Fla, një pronë që është afër vendit ku jetojnë tani zonja Trump dhe zoti Kushner. Familja Kastrati vitin e kaluar bleu një hotel në seksionin Brickell të Miami për 55 milionë dollarë nga familja mbretërore e Katarit.
Musa Kastrati, në një intervistë, tha se roli që kompania e tij do të luante në projektet shqiptare të zotit Kushner nuk ishte ende i qartë, por ndoshta do të përfshinte ndihmën për ndërtimin e disa prej komplekseve.
Z. Kastrati po ashtu konfirmoi se ka vizituar Mar-a-Lago, resortin dhe rezidencën e zotit Trump në Florida, në dhjetor të 2022-shit me zotin Grenell dhe se gjithashtu ka takuar shkurtimisht ish-presidentin Trump teksa po darkonin. Zoti Kastrati tha se nuk diskutoi për marrëveshjen e mundshme me zotin Trump.
Qeveria e Arabisë Saudite njoftoi kohët e fundit se po kërkonte mënyra për të rritur investimet e saj në Shqipëri, së pari duke ndihmuar në ndërtimin e shërbimeve të ujit, energjisë elektrike dhe kanalizimeve pranë zonave të plazhit në Vlorë, që është pika e nisjes për në Sazan dhe ku po ndërtohet një aeroport i ri ndërkombëtar. Ajo ka thënë se dëshiron të investojë deri në 300 milionë dollarë në vend.”, thuhet ndër të tjera në artikullin e New York Times.
