Partia Demokratike ka reaguar këtë pasdite në lidhje me amnistinë fiskale.
Në një deklaratë për mediat sekretari për çështje ligjore, Ivi Kaso tha se reagimi i Ambasadoreve të Gjermanisë dhe Francës duke braktisur takimin është përgjigja me e mire për veprimet harbute të kryeqeveritarit.
Sakaq shtoi se PD dënon ashpër sjelljen e kryeministrit Rama ndaj dhomës Amerikane dhe Gjermane të Tregtisë
Deklarata e plotë:
Ambasadorët braktisin takimin me Ramën. PD përshëndet qëndrimin e tyre dhe të Dhomave Amerikane e Gjermane. Pas gazetarëve, kosovarëve, bullgarëve dhe zyrtarëve të Brukselit, Edi Rama iu përvesh sot dhomave të Tregtisë të vendeve partnere. I quajti ‘fletërrufe’ reagimet e tyre kundër amnistisë fiskale, dhe vuri në skenë rolin e sovranistit.
Është i njëjti që bën si globalist kur Sali Berisha, Albin Kurti, e të tjerë, e përdorin sovranitetin si tezë politike. Partia Demokratike dënon sjelljen arrogante me dhomat Amerikane dhe Gjermane të Tregtisë. I kujtojmë opinionit publik, se ato janë të vetmet institucione, përveç opozitës, të pakapura nga qeveria.
Kjo është arsyeja se, pse Rama shkumëzon. Pas etiketimit si fletërrufe të reagimeve, urojmë të mos i dënojë me riedukim. Sjellja prej eurotlanticisti në mbrëmje dhe putinisti në mëngjes, e zbulon Edi Ramën si hipokrit. Duke mbështetur sërish qëndrimin e Dhomave, falënderojmë trupën e biznesit të huaj që punon në Shqipëri, një akt heroizmi në kushtet e një qeverie armiqësore me ta. Reagimi i Ambasadoreve të Gjermanisë dhe Francës duke braktisur takimin është përgjigja me e mire për veprimet harbute të kryeqeveritarit. Ritheksojmë rrezikun që sjell amnistia fiskale Rama-Ahmetaj-Gjiknuri-Veliaj.
Potpuria e skandaleve të kësaj qeverie e ka vulosur motivin pas kësaj amnistie. “Çunat problematikë” të botës së krimit dhe “bravoçunat” e qeverisë duan të përmbyllin etapën e fundit të kontratës së tyre. Të legalizojnë, jo vetëm paratë e pista, por edhe të normalizojnë të keqen. Kalimi i kësaj pakete e rrezikon Shqipërinë.
