Serbia po blen armatime të reja dhe po prodhon edhe vet të tjera duke bërë sërish një ushtri të madhe si ajo e kohës së Sllobodan Milosheviçit. Por as Kosova nuk qëndron më pas dhe në kuadër të forcimit të masave të mbrojtjes, ka parashikuar edhe për vitin që vjen, shtimin e shpenzimeve ushtarake.
Qeveria e Kosovës miratoi buxhetin për vitin 2022 në vlerë prej 2 miliardë e 748 milionë euro dhe prej tyre, plot 100 milionë euro do t`i shkojnë modernizimit të mëtejshëm të ushtrisë.
Kryeministri Albin Kurti, deklaroi se, kjo është hera e parë që ndahet një shumë për ushtrinë.
“Ushtrinë dhe mbrojtjen e kemi projektin tonë madhor, ndaj për herë të parë kemi ndarë një buxhet prej 100 milionë euro apo 1.3% të prodhimit të brendshëm bruto e synimi ynë është që këtë ta çojmë në 2% të GDP-së”,- tha Kurti.
Kosova do të rrisë numrin e pjesëtarëve të Forcës së Sigurisë së Kosovës me 840 rekrutë të rinj. FSK numëron afërsisht 2500 anëtarë të rregullt dhe 800 rezervistë.
Në dhjetor të vitit 2018, Kuvendi i Kosovës miratoi ndryshimet ligjore, për të ndryshuar mandatin e FSK-së. Kësaj force është thënë se do t’i nevojitet një periudhë kohore prej dhjetë vjetësh, për t’u transformuar në ushtri me kapacitete të plota.
Me planin gjithëpërfshirës të tranzicionit, planifikohet që numri i pjesëtarëve të FSK-së të arrijë në 5 mijë pjesëtarë aktivë, dhe 2500 rezervistë.
Dy milionë euro nga “Buxheti 2022”, për herë të parë sipas Kurtit, do të ndahen edhe për Luginën e Preshevës.
“Këto e shumë investime të tjera janë bërë të mundura me vetëm shtatë muaj qeverisje të mirë”,- tha Kurti. Qeveria e Kosovës me kryeministër Albin Kurtin është zgjedhur më 22 mars. Projektligji për buxhetin kalon tani për miratim në Kuvendin e Kosovës.
/Priza.al/
