Kancelari i Gjermanisë, Olaf Scholz, ka thënë se Kosova shkon drejt anëtarësimit në Bashkimit Evropian me zgjidhjen e dialogut me Serbinë.
Në konferencë për media në Prishtinë, ai ka thënë se dy vende që nuk e njohin njëra-tjetrën nuk mund të jenë pjesë e BE-së.
“Me rëndësi për Kosovën është që dialogu i ndërmjetësuar nga BE të çohet përpara. Kosova dhe Serbia përmes një marrëveshje gjithëpërfshirëse të çojnë në zgjidhje politike. Dialogu është rruga që i hap Kosovës perspektivën evropiane. Një marrëveshje politike mes dy vendeve është një kusht i rëndësishëm edhe për perspektivën e të rinjve në Kosovë. Marrëveshja në fund duhet të zgjidhë edhe çështjen e njohjes së Kosovës, sepse është e paimagjinueshme që dy vende që nuk e njohin njëra-tjetrën të bëhen pjesë e BE-së. Të dyja palët duhet t’i qasen njëra tjetrës”, ka thënë Scholz.
Scholz tha se Kosova ka shans real për anëtarësim në BE, por kjo mund të zgjasë.
Scholz: Serbia që aspiron BE duhet të pranojë sanksionet ndaj Rusisë
Kancelari gjerman përmendi rregullat që një shtet duhet t’i ndjekë, duke theksuar sanksionet që shteti që aspiron drejt BE-së duhet t’i pranojë t’ia vëjë një tjetri. Ai tha se s’duhet të ketë dyshime mbi vendosjen e sanksioneve kundër Rusisë për të dënuar agresionin e saj në Ukrainë, siç po bën Serbia.
“Ne kemi edhe më tej besim që kjo rrugë e nisur drejt BE ka një shans realist. Për dikë kjo rrugë shkon më shpejt e për dikë më ngadalë”.
I pyetur për pozicionin e Gjermanisë për nismën rajonale, “Ballkani i Hapur” dhe sa mund të dëmtojë kjo iniciativë marrëveshjet në kuadër të Procesit të Berlinit, Scholz tha se tregu i përbashkët është një prioritet i lartë për Gjermaninë, një çështje që duhet përmirësuar.
“Të gjithë duan të anëtarësohen në BE edhe ashtu ka rregulla të lirisë së lëvizjes. Kushdo që dëshiron të anëtarësohet në BE duhet ta respektojë këtë”, tha lideri gjerman.
Kancelari gjerman ka thënë se edhe liberalizimi i vizave për qytetarët e Kosovës duhet të shkojë përpara duke shtuar se po angazhohet për këtë.
“Liberalizimi i vizave duhet të shkojë përpara, duhet ta bëjë punën e saj Kosova. Po angazhohemi me partnerë me këmbëngulje”.
“Unë e kam thënë më herët, ne angazhohemi që liberalizimi i vizave të vijë sa më shpejt pasi kushtet janë plotësuar dhe për këtë flasim me të gjithë partnerët që edhe ata të binden siç jemi bindur ne”.
Scholz tha se Kosova është një partner i besueshëm dhe se këtë e ka dëshmuar me përgjigjen ndaj agresionit rus në Ukrainë.
Ai shtoi se Procesin e Berlinit do që ta rijetësojë dhe në vjeshtë ftoi kryeministrin Albin Kurti në konferencë në Berlin.
Kurti: Në fund të vitit aplikojmë për statusin e vendit kandidat
Kryeministri i Kosovës, Albin Kurti, ka kërkuar mbështetjen e kancelarit gjerman, Olaf Scholz për integrim të vendit në Bashkim Evropian, duke bërë të ditur se në fund të këtij viti do të bëhet aplikimi për statusin e kandidatit për BE.
“Në përputhje me premtimet dhe perspektiven evropiane po punojnë për përmbushjen e reformave për anëtarësim në BE. Do të vazhdojmë edhe me aspiratën tonë për statusin e kandidatin për BE ku planifikojmë të aplikojmë në fund të këtij viti”, ka thënë Kurti në një konferencë për media pas takimit me kancelarin, Scholz të premten në Prishtinë.
Kurti gjatë konferencës ka falënderuar kancelarin Scholz për mbështetjen e vazhdueshme të Gjermanisë ndaj Kosovës, teksa ka shtuar se edhe Kosova do të vazhdojë të jetë aleat besnik i këtij shteti.
“Gjermania ka luajtur rol të jashtëzakonshëm në rindërtimin e Kosovës. Kancelarin Scholz e sigurova se Kosova është dhe do të mbetet partner i besueshëm i Gjermanisë”, ka shtuar Kurti.
Kurti ka thënë se prania e NATO-s në Kosovë është e domosdoshme.
