Shitblerja e votës duket se do të jetë pjesë përbërëse edhe këtë herë në zgjedhjet e 25 prillit, ku forca të caktuara politike po orvaten në forma të ndryshme për ta realizuar.
Por ambasadorja amerikane Yuri Kim, ka deklaruar nga Fieri se, SHBA-të nuk mbështesin asnjë parti apo kandidat të caktuar politik.
Në një dalje për mediat në Fier, ku tha se, ndodhet si pjesë e përpjekjeve për të parë sa më shumë nga Shqipëria, veçanërisht para zgjedhjeve, ambasadorja Yuri Kim, bëri një paralajmërim të fortë për këdo që përpiqet të mohojnë të drejtën e popullit për të votuar, duke e blerë apo shitur votën.
“Është pjesë e përpjekjeve të mia që të shikoj sa më shumë nga Shqipëria veçanërisht duke pasur parasysh se jemi para zgjedhjeve të 25 prilli. Unë jam një person shumë i drejtpërdrejt dhe ju siguroj që nëse do të doja që ju të votonit për dikë do ua thosha, dhe jo një mesazh të fshehur.
SHBA-të nuk mbështesin një parti apo një kandidat të caktuar politik, e vetmja gjë që mbështesim është e drejta e popullit shqiptar që të shprehë vullnetin e tij përmes votës. Paralajmërojmë kundër kujtdo që duan ta mohojnë këtë të drejtë duke e blerë apo duke e shitur votën.
Kjo është shumë e rëndësishme që votuesit ta mbajnë mend që ata kanë fuqinë, por edhe përgjegjësinë. Jam e frymëzuar sot, sepse në Vlorë jam takuar me drejtuesit e shoqërisë civile aty, në një demokraci shoqëria civile ka një rol jetik”,- deklaroi ambasadorja Yuri Kim.
Ajo tha më tej se, ishte takuar në Fier me votues të rinj dhe i kishte bërë përshtypje informacioni i tyre. Ambasadorja Kim shprehu besim se demokracia është në drejtimin e duhur.
“Këtu në Fier u takova me votues që do të votojnë për herë të parë. Dhe më bëri përshtypje se sa të informuar ishin dhe sa të qartë ishin për të drejtat e tyre.
Ne nuk folëm për kë ata do të votonin sepse kjo është personale, por patëm një diskutim për atë që mendonin ndërsa vendosnin për kë do të votonin.
Dhe nga kjo ndihem besim plotë se demokracia është në drejtimin e duhur dhe të rinjtë të tillë duke shfrytëzuar të drejtën e tyre për të votuar do të mund ta ndihmojnë Shqipërinë për ta vendosur në rrugën e duhur”,- theksoi ambasadorja e SHBA.
/Priza.al/
