Kryebashiaku i Kukësit, Safet Gjici në një konferencë për mediat ka reaguar në lidhje me helmimin e 180 banorëve.
Gjici tha se në rezultatet e ujit të pijshëm nga ISHP, ka rezultuar se ai është plotësisht i pastër dhe se kjo është thjeshtë një virozë. Sakaq, shtoi se fjala helmim do të thotë se mijëra qytetarë të ishin në spital, ku sipas tij kanë qenë persona të PD ata që kanë përhapur panik.
“Ka ardhur përgjigja e analizave, me firmë me vulë, shikojini zero, zero. I keni te Instituti publik, ju bëj thirrje qytetarëve ta pinë ujin, e them me përgjegjësi të plotë. Nuk mund të flasësh, është çështje e prekshme për ne, nga sot kemi të gjitha analizat një për një.
Merrni dhe bëjini kopje. Një rast i izoluar në lagjen Muja në Shtiqen, por ky rast s’ka lidhje me tubin kryesor, por me shtëpinë. Fjala helmim do të thotë se mijëra qytetarë të ishin në spital, të gjithë ata shpifësat e që hapën panik, kjo lloj viroze mund të vinte, këta ta interpretojnë si të duan. Krahu i PD-së ka përhap panik, kishim disa qytetarë te spitali dhe shkova u interesova. ISHP ka punën e tij, laboratori i AKU-së ka punën e tij, këto qytetarë kanë virozë, kemi pas raste dhe në dimër. Shumë qytetarë kanë ikur kanë bërë serum e s’ka pas problem, ka të tjerë që kanë pirë ujë të blerë.
Ne nuk dilnim dot në deklaratë pa dalë analizat, është shumë e thjeshtë të thuash që uji është helmuar dhe se duan ta fshehin, u bëj thirrje kuksianëve të pinë ujtin se janë kryer analiza të thella”, tha Gjici.
